Ukhuza ibuya eSABC uDJ Sbu njengoba ezothatha izintambo ohlelweni lwasekuseni phakathi nesonto kuRadio 2000 kusuka ngoMsombuluko.
UDJ Sbu uzovala isikhala sikaGlen Lewis okubikwa ukuthi uya kwiKaya FM.
Lo msakazi uzokwethula uhlelo i-#NoNameBreakfast ngo-6 kuya ku-9 ekuseni noNathi Ndamase noLelo Mzaca.
UDJ Sbu uke wasakaza eziteshini ezahlukene okubalwa kuzo iYFM, Metro FM, Ukhozi FM neMassiv Metro ayisungula. Unane-podcast esakaza kuYoutube.
Lesi siteshi siphinde samemezela ukuthi sijoyinwa nawuDJ Cleo ozoba nohlelo lwakhe lomculo i-The Eskhaleni Party. Luzongena njalo ngoLwesihlanu ngo-10 kuya ku-12 ebusuku.
Ngaphandle kwalokhu, izinhlelo zaphakathi nesonto azishintshanga njengoba ngemuva kukaDJ Sbu kuzoqhubeka uNtombi Phiri nngo-9 kuya ku-12 bese elandelwa nguDavid Mashabela kuze kube wu-3 ngaphambi kokuthi uPaul Mnisi athathe izintambo kuyoshaya u-6 ntamama.