Kubikwa ukuthi sekuhlukene inhloko nesixhanti phakathi kwesilomo somsakazi uPenny Ntuli nesiteshi asakaza kuso iGagasi FM.
UPenny, ujoyine iGagasi FM ngo-2022 ngemuva kokufaka i-video esakaza esemotweni esho nokuthi ufisa ukuba yingxenye yalesi siteshi.
Wethula uhlelo iGagasi FM Top 40 noHeazy njalo ngoMgqibelo ekuseni.
Kuvela ukuthi izingxoxo mayelana nenkontileka entsha, okumele iqale ngenyanga ezayo, zifikelele kwangqingetshe nokuholele ekutheni kuhlukwane.
Njengamanje isiteshi silungiselela unyaka omusha kwezokusakaza oqala ngo-Ephreli 1.
Okhulumela isiteshi uKhulekani Shandu uthe akukho azokuphawula ngoba izinguquko ezinhlelweni zabo bazozimemezela ngesonto elizayo.
“Sikuphi isidingo sokuthi simemezele ngesonto elizayo uma ngizophawula manje? Zikhona izinguquko ezizoba khona kodwa sizomemezela ngesonto elizayo,” kusho uKhulekani othe ngeke aqinisekise noma akuphike ukuhamba kukaPenny.