UTHINTEKILE umqeqeshi weMamelodi Sundowns, uPitso Mosimane, ngokusula isigubhukane njengomqeqeshi we-Orlando Pirates kobeyimbangi yakhe uMilutin “Micho” Sredojevic.
EZimnyama zimemezele ngoLwesihlanu ebusuku ukuthi uMicho usesulile ebeka izizathu zangasasese kwathiwa izintambo zizobanjwa uRulani Mokwena esizwa uFadlu Davids noFranck Plaine.
UMicho uhlale kwiPirates amasizini amabili agcwele. Kulawo masizini uyithwalise kanzima iSundowns embangweni wesicoco seligi aqede kabili belele endaweni yesibili kunqoba amaBrazilians.
UMosimane uveze ukuthi ukwazana kwabo noMicho kusuka kudala esewumqeqeshi weSuperSport United.
“Ngiphatheke kabi kakhulu (ngokuhamba kukaMicho). UMicho uyena owanginikeza uDenis Onyango waphinde wanginika nomunye umdlali wesokunxele emuva. Ngimazi kudala esekwiSt George engimema emqhudelwaneni iCECAFA ngizobheka abadlali ebalula uDenis nabanye abadlali. Ngimthumelele umyalezo, angikabheki ukuthi usephendulile yini, ngimazisa ukuthi ngiphatheke kabi ngokuhamba kwakhe. Besinombango omuhle naye. Asikaze sichukuluzane. Ungumqeqeshi osezingeni eliphezulu futhi ozithobile ngisho kuthiwa uhluliwe. Ubengafani nami angikuthandi ukwehlulwa. Uyafana noSteve Komphela ngiyafunda kubona,” kusho uMosimane.
Ubekhuluma nabezindaba ngemuva kokuthi iSundowns idlulele kweyandulela owamanqamu kwiMTN 8 ngokuhlula iBloemfontein Celtic ngo 3-1 eLucas Moripe Stadium ngoMgqibelo ebusuku.
Amagoli ezikaMosimane ashaywe uThemba Zwane iphenathi, uMosa Lebusa noKeletso Makgwala. ICeltic ibibekwe phambili uNdumiso Mabena, wonke la magoli angene ngesiwombe sesibili.
UMosimane uveze ukuthi uwuthumele umyalezo nakuMokwena emfisela inhlanhla.
“Ngimfisele inhlanhla. Kade ayelifuna leli thuba selize lafika. Sengike nganitshela nani ukuthi ngicabanga ukuthi uzoba umqeqeshi osezingeni eliphezulu futhi uzongidlula nami kodwa ibhola luwuhambo olude. Akungamkhathazi ukuhlulwa kwakusihlwa (ngoMgqibelo) lokho kuyingxenye yebhola.
“UMicho besincintisana naye, ubengenza ngihlale manzonzo. Ubengiphusha kule minyaka emibili edlule kodwa iPirates iyohlezi iyiPirates iyohlezi ikhona, inabadlali inejubane. URulani akangakhathazeki. Nami sengike ngahlulwa imidlalo emithathu kulandelana. Niyazi kwenzakalani esimeni esinjalo, wonke umuntu uyakhuluma, babone amaphutha. Ngizokhuluma naye uma kudingeka kodwa angifuni ukugxambukela,” kusho uMosimane.
I-Pirates ikhishwe yiHighlands Park ngo 1-0 kwi-quarterfinal yeMTN 8 ngempelasonto. Lo mphumela ulandele owangesonto eledlule lapho beshaywe yiSuperSport United ngo 3-0 kwiligi ekubeni ihluliwe nakoweChampions League.