USIYABONGA “Bhele” Nomvethe ongadinge kuchazwa ebholeni lakuleli, udalule esinye sezizathu esimenza awagaxe emgibeni amakhokho uma kuphela isizini esikuyona ka-2018/2019.
Uwagaxa nje, usedlale ibhola elikhokhelayo kusuka ngo-1994.
Umgadli waMaZulu FC odabuka KwaMashu, eThekwini, uzodlala umdlalo wokugcina woSuthu elizowudlalela ekhaya eKing Zwelithini Stadium, kusasa, uma selubhekene neBlack Leopards.
Ngokusho kukaNomvethe (41), usathanda ukudlala ibhola kodwa akaboni kuwumqondo omuhle ukuthi aze aficwe indodana yakhe endala uLifa (17) nayo ayichaze njengomdlali oza kahle kunobhutshuzwayo.
UNomvethe udume esemncane kwiSabatha FC ngo-1994, ngaphambi kokudlalela izinkunzi zaseSoweto iKaizer Chiefs, Orlando Pirates neMoroka Swallows. Indlela yakhe eya kulezi zinkunzi zaseSoweto idlule kwi-African Wanderers.
Udlale naphesheya kwezilwandle kwi-Udinese ne-Empoli, amaqembu ase-Italy, iDjurgårdens yaseSweden ukubala nje ambalwa. UBhele ufike kuMaZulu ngesizini ka-2016/2017.
“Sengilihambile ibanga lami ebholeni. Kuyangithokozisa ukuthi konke ngikwenzile futhi nabantu bakuthokozele. Konke ebengikwenza bengingazenzeli mina kodwa bengenzela abalandeli bebhola lonkana. Sekufanele ngidedele abafana abancane, phela okudlula lapha sengizoze ngificwe indodana yami uLifa. Ugqozi lwebhola alusoze lwaphela kimina,” usho kanje uNomvethe izolo.
Kule sizini uNomvethe ushaye amagoli amabili.
“Kuyadingeka ukuthi sijabulise abalandeli kulo mdlalo wethu neLeopards okungowokugcina ekhaya. Ngakho kufanele sivalelise ngesitayela. Angifuni ukuthi yonke into ibe ngami kodwa ngifuna ukubeka iqembu phambili ngoMgqibelo (kusasa),” kusho uNomvethe owale waphetha ukudalula ukuthi uzokwenzani azoziphilisa ngayo uma kuphela isizini.
Umqeqeshi waMaZulu, uCavin Johson, uthe sekuyisikhathi sokuthi uNomvethe abungazwe.
“Sekufike isikhathi sokuthi awagaxe emgibeni amakhokho. Yebo kungenzeka ukuba AmaZulu kukhona akuhlelele uNomvethe ngekusasa lakhe kodwa ngokwami bekufanele sonke isifundazwe simbungaze umdlali oyiqhawe. Kufanele igama lakhe kube khona okwenziwa ngalo ngoba uyisibonelo esihle emphakathini ikakhulukazi entsheni,” kusho uJohnson.
Imidlalo ye-Absa Premiership kule mpelasonto:
NgoMgqibelo ngo-3 ntambama:
Kaizer Chiefs v Free State Stars (Mbombela Stadium), Bidvest Wits v Baroka FC (Bidvest Stadium), Maritzburg United v Super Sport United (Harry Gwala Stadium), AmaZulu FC v Black Leopards (King Zwelithini Stadium), Cape Town City v Orlando Pirates (Athlone Stadium), Polokwane City v Chippa United (Old Peter Mokaba Stadium), Highlands Park v Bloemfontein Celtic (Makhulong Stadium)