AMAZULU FC angompetha bePrince Mangosuthu Legacy Cup, emva kokuguqisa iRichards Bay FC ngo 4-2 sekukhahlelwa amaphenathi izolo ntambama kowamanqamu omqhudelwano ePrince Mangosuthu Regional Stadium, oLundi.
Kulo mdlalo obuphele zibambene ngo 0-0, unozinti waMaZulu, uVeli Mothwa, ube yiqhawe evimba amaphenathi amabili emdlalweni othathwa njengowomkhaya baKwaZulu-Natal.
AmaZulu abefinyelele kowamanqamu ngokuguqisa iZululand Invitation XI ngo 4-3 sekukhahlelwa amaphenathi, kwaba ngesifanayo nakwiRichards Bay nayo eguqise iMamelodi Sundowns ngo 4-3 kumaphenathi.
Kubukeka sengathi abaqeqeshi bamaqembu abedlala emqhudelwaneni, ikakhulu iRichards Bay naMaZulu, basebenzise umdlalo ukuvivinya izinduku zabo ezintsha.
KuMaZulu kubonakale okokuqala uGabadinho Mhango, uVeluyeke Zulu, uRally Bwalya, uRiaan Hanamub, noDumisani Zuma. Kanti kwiRichards Bay kubonakale uSibusiso Mthethwa, u-Abel Mabaso, uNkanyiso Zungu, uNdiviwe Mdabuka, noSalim Magoola.
Ngemuva komqhudelwano AmaZulu neRichards Bay bazophinde bayibambe ngoJulayi 30 kuya ku-3 Agasti, emqhudelwaneni iKZN Premier’s Cup, ozodlalelwa eKing Zwelithini Stadium, eMlaza, eThekwini naseHarry Gwala Stadium, eMgungundlovu.
Kulo mqhudelwano kuzodlana imilala wonke amaqembu aseKZN adlala kwiPSL, okuyiRichards Bay, AmaZulu, iLamontville Golden Arrows, iMaritzburg United, iRoyal AM noThongathi FC.
Le miqhudelwano yokuzifudumezela ukuqala kwesizini ibukeka ifike ngesikhathi esikahle kwazise la maqembu azilungeselela ukuqala kwesizini yeDStv Premiership eqala ngo-Agasti 5.
Abaqeshi bamaqembu aseKZN abedlala kulo mqhudelwano kubukeka bezoya kowePremiers Cup sebebone kahle ukuthi abadlali bawo abasha bakuliphi izinga nokuthi bazobathaka kanjani uma sekuqala imidlalo yeDStv Premiership ngo-Agasti.