UMQEQESHI weKaizer Chiefs, uNasreddine Nabi, osazama ukuthola isixazululo ngokushaya udaka kweqembu lakhe, uphinde wayigcizelela eyokwehlisa umoya kubalandeli baleli qembu.
UNabi ukusho lokhu ngemuva kokuba iChiefs ishaywe okwesibili imidlalo ilandelana eThekwini, ikhala ngaphansi kwiLamontville Golden Arrows ngo 2-1 ngoMgqibelo eMoses Mabhida Stadium, eThekwini, emdlalweni weBetway Premiership. Ishaywa yi-Arrows nje, ibibuya kwesinye isibhaxu sika 2-0 ebisithole kwiRichards Bay FC ngaphambi kwekhefu leFifa.
Ukuqhubeka nokushaya udaka kweChiefs kuyabanenga abalandeli baleli qembu njengoba sebekhona abalibeka ngesihloko ezinkundleni zokuxhumana elokuthi lo mqeqeshi odabuka eTunisia, sekufanele akhonjwe indlela ngoba uyamehlula umsebenzi.
“Uma ufuna ukuwina kufanele ushaye amagoli, akusizi ukulawula umdlalo kodwa amagoli ungawashayi. Bekungekona okokuqala ukuthi silawule umdlalo ngale ndlela. Miningi imidlalo esenze into efanayo kuyona sagcina singabuyanga nalutho,” kusho uNabi.
“Ngilithwala mina icala, hhayi abadlali. Ukushintsha lesi simo esibhekene naso, sidinga ukubekezela nokuba nabadlali abathe xaxa kuzo zonke izindawo ukuze kuthi noma sishintsha abanye sifake abanye abazongena benze kangcono. Siyasiqonda isimo abalandeli abakuso kodwa siyabanxusa ukuthi behlise umoya, bangahlaseli abadlali, kodwa babavikele ngoba isizini ayikapheli. Nginesiqiniseko sokuthi sizozijika izinto.”
Lo mqeqeshi akakufihlanga nokukhathazeka kwakhe ngokulinyalelwa ngabadlali abamqoka okufaka usawoti esilondeni.
Umdlali wasesiswini, uThabo Cele, uphume eselimele ngasekuqaleni kwesiwombe sesibili.
UCele ojoyine leli qembu ngoJanuwari, usekhombise izinga eliphezulu. Lokhu kwenza kungamangazi ukuzwa umqeqeshi wakhe ezwakalisa ukukhathazeka ngokulimala kwakhe.
“Ngibona sengathi sinebhadi lokulinyalelwa ngabadlali. Kumanje abadlali bethu basemuva uReeve Frosler noRushwin Dortley basalimele, kanti sisanda kulinyalelwa nguTashreeq Morris, nakhu manje futhi sesilinyalelwa nguThabo Cele. Sinzima lesi simo esibhekene naso, kodwa kumele siqhubeke siyibambe yize kunjalo," kusho uNabi.
Amakhosi okumanje asendaweni yesishiyagalombili kwi-log, asengcupheni yokuphindwa esangesizini edlule sokwehluleka ukuqeda kwi-Top 8.