UBUSO obujwayelekile obungase bume endleleni ye-Orlando Pirates kwiCaf Champions League kulandela ukuqhathwa kwamaqoqo alo mqhudelwano osungena kuvuthondaba.
IPirates neMamelodi Sundowns baqhathwe kwiChampions League kwathi iStellenbosch FC yaboshelwa kwiCaf Confederation Cup emcimbini obuseCairo izolo ntambama.
IPirates engompetha beCaf Champions League bango-1995 ifakwe ku-Group C okuboshelwe kuwona iqembu elivikela isicoco i-Al Ahly yase-Egypt, CR Belouzdad yase-Algeria neStade D’Abijan yase-Ivory Coast.
Imidlalo yamaqoqo kwiChampions League nakwiConfed Cup iyaqala ngasekupheleni kukaNovemba.
IPirates ne-Al Ahly bagcina ukubhekana kowamanqamu weChampions League wango-2013 osekungumlando ukuthi wanqotshwa iqembu lase-Egypt.
I-Al Ahly iholwa isilomo seBafana Bafana, uPercy Tau kanti kwiBelouzdad kukhona, uKhanyisa Mayo, osanda kuyijoyina esuka kwiCape Town City.
Kubhekiwe nokuthi uzokwenzenjani, uManqoba Mngqithi, ku-Group B lapho iSundowns izobhekana khona neRaja Casablanca ne-ASFAR Club okungamaqembu aseMorocco, ne-AS Maniema Union yaseDemocratic Republic of Congo (DRC).
KwiConfed iStellies esisele yodwa kwawakuleli, ifakwe ku-Group B okukhona kuwona i-RS Berkane yaseMorocco, Stade Malien yaseMali neCD Lunda Sul yase-Angola.
Esewonke amaqoqo kwiChampions League nakwiConfed Cup adidiyelwe kanje:
CAF CHAMPIONS LEAGUE
GROUP A: TB Mazembe, Young Africans, Al Hilal SC, MC Alger
GROUP B: Mamelodi Sundowns, Raja CA, ASFAR Club, AS Maniema Union
GROUP C: Al Ahly, CR Belouizdad, Orlando Pirates, Stade d’Abidjan
GROUP D: ES Tunis, Pyramids FC, GD Sagrada Esperança, Djoliba AC de Bamako
CAF CONFEDERATION CUP
GROUP A: Simba SC, SC Sfaxien, CS Constantine, FC Bravos de Marquis
GROUP B: RS Berkane, Stade Malien, Stellenbosch, CD Lunda Sul
GROUP C: USM Alger, ASEC Mimosas, ASC Jaraaf, Orapa United
GROUP D: Zamalek SC, Al Masry, Enyimba, Black Bulls