ISEKHUKHUNE United inethuba lokulungisa umlando phakathi kwayo neMamelodi Sundowns njengoba bezodudulana kwi-quarterfinal yeNedbank Cup namuhla.
Umdlalo uzoqala ngo-7 ebusuku eLucas Moripe Stadium, e-Atteridgeville.
Kwakuhlelwe ukuthi lo mdlalo udlalwe ngasekuqaleni kwenyanga kodwa wahlehliswa ngenxa yokuthi ubushayisana noweqembu lesizwe labesifazane lika-Under 17.
Ukuze iBabina Noko izodlulela kowandulela owamanqamu kuzomele yenze engakaze ikwenze, okuwukuhlula amaBrazilians.
Bazobe beqala ukuhlangana kowomkhumulajezi. Kweyisishiyagalombili yeligi, iSundowns inqobe eyisikhombisa, zabambana komunye.
AmaSandawana aseyigingqe kabili kweyeligi iSekhukhune kule sizini. Inqobe ngo 3-0 ekhaya ngoNovemba, nango 4-2 ngenyanga edlule.
ISekhukhune izodlala neSundowns isiholwa ngumqeqeshi omusha, u-Eric Tinkler, oqashwe ngoMashi 10, emuva kokuxoshwa kukaLehlohonolo Seema.
Le ngwazi yeBafana Bafana, ekhululwe yiCape Town City ngoDisemba, nyakenye ngenxa yemiphumela engemihle, inawo umlando wokuhamba ibanga elide kweyomkhumulajezi.
Yanqoba iTelkom Knockout neCape Town City ngo-2016, yaphinde yadla isicoco seMTN 8 neSuperSport United ngo-2017. Phezu kwalokho, yangena kowamanqamu weNedbank Cup ne-Orlando Pirates, yafinyelela kowamanqamu weCaf Confederation Cup namaBhakabhaka naMatsatsantsa.
Yagila izimanga ifaka iMaritzburg United kowamanqamu kwiTelkom Knockout ngo-2019 kodwa yehlulwa yiSundowns ngo 2-1.
Nakuba uTinkler ebuqonda ubunzima bokubhekana neSundowns, ukholwa wukuthi indlela yena neqembu lonkana abalambele ngayo impumelelelo iyona ezobagqugquzela kulo mdlalo.
"Ngisenguye umqeqeshi enganginguye phambilini. Ngisahlose ukuphumulelela nokuzibona ngiphakamisa izindebe futhi. Yingakho kwaba lula ukujoyina iqembu elinjengeSekhukhune, nalo elifuna izinto ezifanayo," kusho uTinkler engxoxweni asanda kuba nayo neMarawa Sports Worldwide.
"Bonke abaqeqeshi bayafuna ukuthatha izicoco. Okumqoka ukuthi ufika kanjani lapho nokuthi ubakhuthaza kanjani abadlali ukuze bakwazi ukwenza lokhu okufunayo njengomqeqeshi wabo
“Kusobala ukuthi iqembu lingathanda ukufaka indebe ekhabetheni lalo. Sinalo ithuba. Siyazi kuzoba nzima njengoba sizobhekana neSundowns kodwa akekho ongathi ngeke sikwazi ukuyinqoba, singene kowandulela owamanqamu.”
Iqembu elizodlula kusihlwa lizobhekana neKaizer Chiefs kowandulela owamanqamu. Komunye owandulela owamanqamu weNedbank Cup, ompetha i-Orlando Pirates bazobhekana neMarumo Gallants.