Uthongathi (0) 0
University of Pretoria (0) 0
KUSALE kancane ukuthi alale eyidonsa ngamazinyo ingubo umlandeli obephazamisa umdlalo weMotsepe Foundation Championship, ngokushaya indweba kubhekene uThongathi FC ne-University of Pretoria, ePrincess Magogo Stadium, KwaMashu ngeSonto ntambama.
Kuthe kufikwa ekhefini, umlandeli weqembu lasekhaya ubesekhuzwe waze wathenjiswa induku kwazise ubelokhu eshaya indweba obekuphazamisa abadlali kanjalo nonondweba enkundleni.
Umthetho olawula ibhola awukuvumi ukuthi abalandeli bashaye indweba ngesikhathi kuqhubeka umdlalo, kwazise lokhu kuyaphazamisa.
Indaba yokushaywa kwendweba isakhulunywa namanje ngesigameko esenzeke kwiNedbank Cup yango-2009 lapho uJimmy Tau, owayedlalela iKaizer Chiefs ayeka uPhenyo Mongalo, owayedlalela amaTuks, wayoshaya igoli okuyilona elakhipha Amakhosi emqhudelwaneni. UTau wazivikela ngokuthi wezwa kukhala indweba, wangaba esayivimba imbangi.
Umkhuba womlandeli uqale wakhuzwa wunondweba obengaphandle (fourth official) kodwa kwangathi umtshela ukuthi akaqhubeke kakhulu kunakuqala.
Ngenxa yokuthi lokhu bekuphazamisa, abalandeli abebefake imifaniswano eyahlukene abebeseduze naye (lo mlandeli woThongathi), bamthembise induku uma eqhubeka nokungalaleli kwakhe, wabona ukuthi uzoshaywa wayifaka ephaketheni indweba yakhe.
Isiwombe sesiibili sidlale saze saphela umlandeli engazange awuphinde umkhuba wakhe, ocishe wamqhatha nabalandeli abebethamele umdlalo ogcine uphele kungekho iqembu elibona lapho kugxunyekwe ngakhona amapali.
Imiphumela yeMotsepe Foundation Championship: Tshakhuma 2-0 MM Platinum; Polokwane City 3-0 Black Leopards; JDR Stars 0-0 Casric Stars; Hungry Lions 1-0 Pretoria Callies; Venda Academy 1-0 Platinum City Rovers; Magesi 1-2 Cape Town Spurs.