NAKUBA iningi litusa iRichards Bay, ngokusebenza kusakhanya kodwa esinye sezithenjwa zayo uNtsikelelo Nyauza, sithi usemkhulu umsebenzi obahlalele. UNyauza uthi kumele banqobe noma kanjani kwiChippa United, ukuze bangathwali kanzima emlenzeni wesibili weDStv Premieship.
I-Natal Rich Boys izobhekana namaChilli Boys ngeSonto ngo-3.30 ntambama, eBidvest Stadium. Olandelayo izoze iwudlale ngoDisemba 31, isibhekene neMoroka Swallows.
IBay okuyisizini yayo yokuqala kwiPremiership, isetshengise abantu abaningi ukuthi kayizile ukuzodlala. Ilele indawo yesibili kwi-log yeDStv Premieship ngamaphuzu awu-22, emidlalweni ewu-12. Isashaywe kabili.
Sekuphele imidlalo eyisikhombisa kulandelana ingawazi umpetshisi.
Leli qembu elicijwa nguPitso Dladla, lizotholana neChippa eguqiswe yiCape Town City ngo-1-0 kobusekhaya ngesonto eledlule, eKing Zwelithini Stadium.
UNyauza obedlala kwi-Orlando Pirates emasizinini edlule, uthe njengoba kuzoba umdlalo wokugcina ngaphambi kwekhefu leNdebe yoMhlaba, badonswe ngendlebe ukuthi kumele banqobe kumnyama abomvu.
"Uma siqeda ngomdlalo weChippa sizosalelwa oweSwallows, noweMamelodi Sundowns bese singena emzuliswaneni wesibili weligi. Kuzobe sekuhlungwa abafana emadodeni. Umzuliswano wesibili weligi unzima ngendlela eyisimanga. Kunamaqembu alwela ukuvika izembe, amanye afuna ukungena kwi-Top 8, nafuna ukunqoba isicoco seligi.
“Amaqembu angenabo abadlali abaningi athwala kanzima ngoba kusuke sekukhona nokukhathala. Yingakho kumele siqoqe amaphuzu ngobuningi emzuliswaneni wokuqala ukuze singezugqilazeka kowesibili. Yebo, izinto zisasihambela kahle kodwa siyakudinga ukuqoqa amaphuzu amaningi ngokushesha. Kungaba kuhle ukuthi siye ekhefini leNdebe yoMhlaba siyinqobile kwiChippa," kubeka isitobha seBay.
Siqhube sathi: "Nakuba ingekho ingcindezi ephuma kubaphathi kodwa kungangijabulisa ukuthi siqede kwi-Top 8. Yingakho kuzomele sinqobe kumnyama kubomvu kwiChippa. Kuzoba umdlalo onzima ngoba iphuma ekuhlulweni yiCape Town City. Futhi izobe idlalela ekhaya.“
Okwamanje irekhodi leBay lemidlalo yasekuhambeni liqhakazike ngoba ayikakashaywa. Inqobe emihlanu, yadlala owodwa ngokulingana ne-Orlando Pirates. Isishaye amagoli ayisikhombisa.
Kweyisithupha eyidlalele ekhaya, isanqobe emibili, yadliwa kowodwa yase idlala ngokulingana kwemithathu.
UNyauza selokhu efikile kwiBay ekuqaleni kwesizini usegijime imidlalo eyisishiyagalombili, washaya igoli elilodwa benqoba iStellenbosch ekuhambeni. IChippa isendaweni yesithupha, ngamaphuzu awu-17. Ngemuva komdlalo iyoze ibuyele enkundleni ngoDisemba 31, lapho izobhekana neStellenbosch, eDanie Craven Stadium.