UMUZWA wokuzethemba ovunguza ekhempini yeKaizer Chiefs muva nje, wenza iqembu laseNaturena, lingene esigabeni sesibili sesizini ngokuzethemba. Kanti likhombise izimpawu zokubuyisa isithunzi nakwiNedbank Cup.
Lokhu kushiwo nguBruce Bvuma, okubukeka eselenze elakhe ijezi ezintini zeChiefs kulezi zinsuku. Ubekhuluma nethimba labezindaba laMakhosi ngamalungiselelo omdlalo weBetway Premiership abazowudlala neSperSport United namuhla ngo-7.30 ebusuku e-FNB Stadium, eNasrec.
IChiefs izofika kulo mdlalo ishayela phezulu kulandela iwini ka 3-0 kwiChippa United kowe-Last 16 yeKe Yona, obukuyona le nkundla ngempelasonto edlule.
Le wini yeChiefs ikhuphule ithemba ngokujika kwezinto kuleli qembu elingazange liyiqale ngendlela obekulindeleke ngayo isizini ka-2024/2025.
“Indlela esinqobe ngayo kwiChippa ikhulisa ithemba kozakwethu ngeNedbank kanti nakwiligi asenzi kabi yize singekho la esasihlele ukuthi sizobe sesikhona maphakathi nesizini,” kusho uBvuma.
“Akekho okungabazayo ukuthi siyothwala kanzima okuyinto ejwayelekile emaqenjini aphekwa nguGavin (Hunt). Sesidlale nayo kabili kule sizini iSuperSport, sashayana ngakho-ke lo owesithathu uzoba ngowamagqubu.”
Ngokubona kukaBvuma iwini yeChippa ivukuze okuthile kubona bengabadlali kanti nethuba lokunombela kwi-log liyabajabulisa.
“Siyaqonda singabadlali ukuthi sinethuba elingakanani ngeNedbank kanti nakwi-log ithuba lokunombela liselikhulu kodwa ukhiye wukuthi singawudedeli umgqigqo,” kusho unozinti ongawuvali umlomo ngoThabo Cele, Tashreeq Morris, noGlody Lilepo abasanda kufika.
“Indlela abasheshe bangena ngayo esitayeleni iyakhombisa ukuthi kungani iqembu libashele isikhathi eside.”
Lo nozinti owenza balizwe ngendaba ijezi uFiacre Ntwari, noBrendon Petersen, uhambe emazwini omqeqeshi wakhe, uNasreddine Nabi, ngesidingo sokubamba umgqigqo wakamuva.
“Sidlale kahle kwiChippa kodwa ngikholelwa ekutheni kuningi okungcono esisengakwenza ukuze sifike lapho siphupha ngokufika khona,” kusho yena.
“Okubalulekile wukuthi singajabuli kuze kweqe ngoba sinomdlalo weligi omqoka neSuperSport. Uma singaqhubeka ngale ndlela ngiyakholelwa ekutheni kukhona esingakuzuza kulo mdlalo.”
IChiefs esendaweni yesithupha kwi-log ngamaphuzu angu-25 emidlalweni engu-17, izodlala ngaphandle komdlali wasesiswini uSamkelo Zwane odonsa isigwebo samakhadi aphuzi. Uzophambana nokaputeni wakhe, uYusuf Maart, ongawudlalanga oweChippa ngenxa yawo amakhadi amane aphuzi.
Isiyonke imidlalo yeBetway Premiership kuleli sonto imi kanje:
Namuhla
Kaizer Chiefs v SuperSport United (FNB Stadium, 7.30pm); TS Galaxy v Stellenbosch FC (Mbombela Stadium, 7.30pm); Cape Town City v Chippa United (Athlone Stadium, 7.30pm); Polokwane City v Magesi FC (Old Peter Mokaba Stadium, 7.30pm).
Kusasa
Golden Arrows v Orlando Pirates (Mpumalanga Stadium, 7.30pm); Marumo Gallants v Mamelodi Sundowns (Seisa Ramabodu Stadium, 7.30pm); Sekhukhune United v AmaZulu FC (Old Peter Mokaba Stadium, 7.30pm).