AKAFUNI nokuyingena eyokuthi kunabadlali bakhe abamataniswa ne-Orlando Pirates umqeqeshi wePolokwane City, uPhuti Mohafe.
Kunamahlebezi okuthi umdlali wasesiswini osephenduke inyama kuleli, u-Oswin Appollis, noThabang Matuludi bangase bagijime kweZimnyama maduze nje.
Njengoba kuvulwe iwindi lokuhwebelana ngabadlali ngoJanuwari 1 elizovalwa ngasekupheleni kwenyanga, kulindeleke ukuthi kube nabadlali abashintsha amaqembu. Abanye bafuna amadlelo aluhlaza, abanye bazama izindlela zokuthola ijezi.
U-Appollis, ogijima kwesokunxele, ungomunye wabadlali abagqamile kwiligi yakuleli kule sizini futhi uphinde wagila izimanga edlalela iqembu lesizwe, iBafana Bafana.
UMathuludi, odlala emuva kwesokudla, usezakhele igama ngokumaka aphinde ashoshele phambili. Wafakwa naseqenjini lesizwe elamenyezelwa ngumqeqeshi, uHugo Broos, ngaphambi kwemidlalo yokuhlungela i-Africa Cup of Nations (Afcon) ne-Uganda neSouth Sudan ngoNovemba nyakenye, wagcina engomunye wabasala ngaphandle ngesikhathi sekukhethwa isikwati sokugcina.
“Le ndaba yokumataniswa kwabadlali bethu nabanye abantu ayiqhutshwe abantu abanezinhloso zabo. Ngicabanga ukuthi akufanele silokhu sizihlanganisa nayo ngoba lawo ngamahlebezi nje. Angisiboni isidingo sokuthi ngilokhu ngikhuluma ngalolu daba,” kusho uMohafe.
“Abadlali naba bakhona ngakho-ke lokho kusho okuhlukile. Ngibona kungcono ukuthi ngidedele abakhulumayo baqhubeke nakho kodwa asikho isidingo sokuthi ngikhulume nalaba badlali, bayazi ukuthi babhekene nani.”
IPirates ijwayele ukusebenzisa isilomo sayo, uRelebohile Mofokeng, kwesokunxele kule sizini lokusho ukuthi kungamele ayiswe kwenye indawo ukuze kuvuleke isikhala sika-Appollis.
Uma kwenzeka uMathuludi enquma ukuya kwezikaMagebhula, angafike abange ijezi nenqwaba yabadlali okubalwa kubona uDean van Rooyen, Thabiso Lebitso, Thabiso Monyane noBandile Shandu.
IRise and Shine isendaweni yesithathu kwi-log yeBetway Premiership ngamaphuzu angu-22 emidlalweni engu-13. Emdlalweni wakamuva ibambane nomakhelwane bayo baseLimpopo, iSekhukhune United, ngo 1-1.
Izobuyela enkundleni uma isiyovakashela iSuperSport United koweligi ozodlalewa eLucas Masterpieces Moripe Stadium, ePitoli, ngoMgqibelo.