IMAMELODI Sundowns iweze ngelibanzi izimbangi zeSuperSport United iyithela othulini emdlalweni weDStv Diski Challenge eMpumalanga.
ISuperSport, esahlezi esicongweni se-log yeDiski ngamaphuzu angu-49 emidlalweni engu-24, kade ibheke ukunwena igebe lamaphuzu lifike kwayisikhombisa phakathi kwayo ne neCape Town City, ishiye i-Orlando Pirates ngayisishiyagalombili. Ngaphezu kwalokho kade ibheke ukuwina umdlalo weshumi kulandelana okuyirekhodi elibeke ngesizini edlule.
Ukwehlulwa kwayo ngomakhelwane bayo basePitoli, iSundowns kubuyise embangweni weligi iCity nePirates abayiwinile imidlalo yabo. I-The Citizens icoshe amaphuzu amathathu yehlula omkhaya bayo iStellenbosch ngo 3-2 emdlalweni ebilandela ngemuva kuwona ngo 2-0. ICity iqhamuke isishaya ngoMark Mayambela ebhentshini oseqeqesha ngokubambisana no-Ian Tyler.
UMayambela ubekade eqeqesha iqembu leCity lika-Under 19. Kade esohlelweni lokuqeqesha iFifa Youth Coaching Course emasontweni adlule. Ukuwina kweCity, ehlale isikhathi eside esicongweni se-log emasontweni adlule, akubuzwa ukuthi kuzobuyisa umdlandla nethemba lokuwina iligi kubadlali bayo.
Isisele ngephuzu kwiSuperSport eseqhulwini. IPirates, yehlule abakhaya iKaizer Chiefs, yavala igebe lamaphuzu phakathi kwayo neSuperSport. Njengelinye lamaqembu asebuya esicongweni, akubuzwa ukuthi izobuyelwa wumfutho wokubuyela empini yesicoco seligi. IPirates enamaphuzu angu-47, isisele ngamabili kwiSuperSport. Imiphumela yemidlalo ezinkundleni ezahlukene ikuqinisekisile ukuthi asemathathu kuphela amaqembu asenethuba lokuwina iligi yeDiski kule sizini.
Ukwehlulwa kwaMaZulu ngo 3-1 yiLamontville Golden Arrows kuholele ekutheni kuvuleke igebe lamaphuzu ayisishiyagalolunye phakathi kwawo nePirates. Usuthu lusendaweni yesine kwi-log yeDiski ngamaphuzu angu-38 emidlalweni engu-23.
Imiphumela yeDStv Diski Challenge: Chippa United 1-2 Maritzburg United; Marumo Gallants 2-1 Sekhukhune United; Swallows 2-3 Royal AM; Mamelodi Sundowns 2-0 SuperSport United; TS Galaxy 0-0 Richards Bay; Cape Town City 3-2 Stellenbosch FC; Orlando Pirates 3-1 Kaizer Chiefs; AmaZulu 1-3 Golden Arrows.