OKUHLE kuyaqhubeka nokuyilandela iStellenbosch FC kulandela ukuhlabana ngemiklomelo yenyanga yeDStv Premiership komgadli wayo u-Iqraam Rayners nomqeqeshi uSteve Barker, abamenyezelwe njengabenze kahle ngoNovemba nangoDisemba nyakenye, emidlalweni yeligi.
IPremier Soccer League (PSL) ikumemezele izolo lokhu kuhambisana nokuthi igoli likaSipho Mbule weMamelodi Sundowns alishaye ngoDisemba, bexebula iCape Town Spurs ngo 3-0 eLoftus Versveld Stadium, yilona eliqokwe njengeDStv Premiership Goal of The Month. UBarker udle oweDStv Premiership Coach of The Month, uRayners wagoduka noweDStv Premiership Player of The Month.
Kuyaqala ngqa emlandweni wemiklomelo yenyanga yePSL ukuthi iStellenbosch ikhiphe umqeqeshi nomdlali ovelele ngesikhathi esisodwa kodwa lokhu kuyizinkomba zokudlondlobala okumangalisayo kwaleli qembu laseKapa.
IStellies idle isicoco seCarling Knokout Cup ngoDisemba nyakenye. Kulowo mqudelwano, uRayners uqoqe amasheke amane kaR100 000 ngokuba umdlali ovelele ngokwahlukana kwemidlalo.
Leli qembu livale unyaka ka-2023 ngesicoco seCarling Knockout esidle eThewini, emuva kokwehlula iTS Galaxy kowamanqamu. IStellies, ewine neligi yeDStv Diski Challenge (DDC) ngo-2022, ikhiqize, uJaydon Adams osesikwatini seBafana Bafana ekwi-Africa Cup of Nations (Afcon), e-Ivory Coast.
URayners ushayele iStellenbosch amagoli amahlanu ngoNovemba nangoDisemba, kwathi umqeqeshi wakhe uBarker wawina eyeligi emihlanu wadlala ngokulingana kowodwa.
“UBarker oke wahlabana ngomklomelo ofanayo eminyakeni emibili edlule, uwawole cishe wonke amaphuzu abebekwe phambi kwakhe ngalesi sikhathi ebesibhekiwe,” besibhalwe kanje isitatimende sePSL ebesimemezela lokhu kuhlabana kwabeStellies.
Kumawini aklomelise uBarker kukhona nayithole kwi-Orlando Pirates, e-Orlando Stadium, eSoweto lapho iqembu lakhe libuye khona ekugcineni kade lilandela emuva lanqoba ngo 3-2.
URayners uhlule abadlali okukhona kubona; u-Evidence Makgopa wePirates. UBarker uhlule uJose Riveiro wePirates ne-Eric Tinkler, weCape Town City.
UCavin Johnson obambile kwiKaizer Chiefs ubalwe nabenza umsebenzi obonakalayo ngokusho kwesitatimende.