Stellenbosch FC (0) 1
TS Galaxy (1) 1
IStellenbosch inqobe ngo 5-4 kumaphenathi
XOLILE MPISANE
IStellenbos ch FC ithole indebe yayo yokuqala ngesikhathi inqoba iTS Galaxy ngo 5-4 sekukhahlelwa amaphenathi kowamanqamu eCarling Knockout eMoses Mabhida Stadium, eThekwini, ngoMgqibelo ntambama.
IStellies ibuye isilandela ngemuva kulo mdlalo ophele zibambene ngo 1-1. Igoli leGalaxy lishaywe nguLehlogonolo Mojela ngasekupheleni kwesiwombe sokuqala, elokulinganisa leStellies lavalelwa ngu-Ismael Toure ngesesibili.
Ithuba lokuqala elicacile litholwe yiStellies ngomzuzu ka-19 kulandela amaphasi asheshayo aphendule izitobha zeGalaxy izibukeli. UFawaaz Basadien uthole u-Iqraam Rayners ebhekene ngqo namapali, ishodi lakhe lavinjwa ngunozinti uFiacre Ntwari ngezinyawo.
Unozinti weqembu likaSteve Barker, uSage Stephens, uze waqala ukubonakala ngomzuzu ka-29 evimba kalula i-freekick kaHigor Vidal ebingagcwalanga kahle.
Igcine ibhakuzile inethi ngomzuzu ka-43 ngesikhathi ikhona ithola uMojela, ozakhele isikhala ebhokisini ngaphambi kokudedela ishodi elishiye uStephens ekhemile.
Kwale kancane ukuthi iStellies ithole igoli ngomzuzu ka-45 ngemuva kokuthola i-freekick ngaphandle kancane kwebhokisi. Ibhola ebeligotshwe nguBasadien lithintwe kancane nguNduli ngekhanda, kodwa uNtwari wakwazi ukulivimba.
Isiwombe sesibili siqale ngomfutho othembisayo njengoba womabili amaqembu ethole amathuba zibekwa. EleStellies litholwe nguDevon Titus oqhamuke ngakwesokunxele wadedela umgundatshani oqonde ngqo kunozinti.
USamir Nurkovic, ongene endaweni kaMarks Munyai ngesikhathi kubuywa ekhefini, naye ulitholile ithuba lokukhahlelela ipali engaphandle kancane kwebhokisi, wakha amabhilidi.
Igoli lokulinganisa lingene ngomzuzu ka-73 ngonyawo lukaToure ngemuva kokuthi iGalaxy ihlulekile ukukhipha ibhola ebhokisini kulandela ikhona.
UStephens uphinde watakula iqembu lakhe ngomzuzu ka-82 evimba ibhola likaSphiwe Mahlangu. Womabili amaqembu azamile ukuthola igoli lokunqoba ngemizuzu yokugcina kodwa kwangavuma, umdlalo waya ku-extra time, nakhona ahluleka ukuthola amagoli.
Kuthe sekukhahlelwa amaphenathi uNtwari wavimba ekaMgaga, kwathi ekaPogiso Sanoka yashaya ipali. IStellies ihambe nendebe ngesikhathi uMojela eyibeka phezu kwepali iphenathi yakhe, uDarrel Matsheke wayinamathisela enethini eyakhe.