SITHEMBISO MKHIZE
UNGENA ezintangeni umnikazi weRichards Bay, uSifiso "Jomo" Biyela uma ebuzwa ukuthi ngabe uzilungele izinselelo zokunqoba iNedbank Cup.
INatal Rich Boyzs idlulele kuma-quarterfinal eNedbank Cup ngemuva kokuqumba phansi iTS Sporting ngo 2-1 emdlalweni weLast 16.
Emdlalweni wokuqala leli qembu eliphekwa uSimo Dladla lawashisa ijezi iKaizer Chiefs.
Kuma-qaurterfinal ezikaBiyela ziqhathwe neChippa United edlule kwiCape Town City ngo-2-1. Umdlalo ungoMgqibelo ngo-3.30pm eSisa Dukashe Stadium, eMdantsane.
Amanye amaqembu adlala kwiGladAfrica Championship akuma-quarter final, iCape Town All Stars ezodlala nontanga bayo iPretoria Callies.
INedbank Cup idume ngokuba nofishi abancane abadla abakhulu, ngo-2019, iTS Galaxy eyayidlala kwiGladAfrica, yamangaza izwe ishaya iKaizer Chiefs kowamanqamu ale nkomishi.
Yaba yiqembu lokuqala elidlala kulesi sigaba ukunqoba lo mqhudelwano, nokudlala kwiCaf Confederation Cup okubikwa ukuthi inezindleko ezimba eqolo.
Ebuzwa uBiyela ukuthi njengoba abafana bakhe beshisa ngalolu hlobo, ngabe uzivivele yini izindleko zokunqoba iNedbank Cup, uthe: "Eish, iqhinga liyozakha uma kwenzeka ngibhekana naleso simo. Ukukhuluma iqiniso, bengingakulindele ukufika kulesi sigaba esesikuso. Ubhekana nezinselelo ezifana nalezi uma unabadlali abanethelante, abalithandayo iqembu labo.”
Uqhube wathi: "INedbank Cup kayikho ezinhlelweni zami, ekhanda kuduma isicoco seligi. Sisembhidlangweni wokuqoqa amaphuzu awu-65. Ngizokwenza konke okusemandleni ukujabulisa abadlali bami ukuze lifezeke leli phupho. Ngingamane ngikhiphe amabhonasi uma kungiphoqa. AmaNatal Rich Boys ngiwafuna kwiDStv Premiership ngesizini ezayo.”
UDan "Dance" Malesela owanqobisa iGalaxy, iNedbank ngo-2019, uthe ukunqoba kweBay kwiKaizer akusho ukuthi kumele bayisabe.
“Ngiwumuntu ongenandaba nokuthi amaqembu aqhathwe kanjani, nokuthi iqembu elithile lizodlala nobani. Okubalulekile ukuthi sizodlala kanjani emdlalweni ozayo, kusiphoqa ukwenyusa izinga. Kunamaqembu asatshwa kungafanele, uthole ukuthi uma sesidlala nawo awanasimanga,” kubeka uMalesela ngemuva kokuqhathwa kwabo.
Nasemidlalweni yeligi iBay kuyihambela kahle. Iqhwakele ngamaphuzu awu-28 emuva kwemidlalo ewu-16.