UKUNCIPHA kwemidlalo esele ngaphambi kokuthi kusongwe isizini ka-2024/25 yeBetway Premiership kusho nokuncipha kwamathuba okuthi amaqembu asengcupheni yokugawulwa yizembe acoshe amaphuzu angawasusa engozini.
Nakuba iPremier Soccer League ingakaqinisekisi ukuthi kuzokwenzekalani ekupheleni kwesizini kulandela ukuxoshwa kweRoyal AM, kulindeleke ukuthi iqembu elizoqeda endaweni ka-15 lidlale kweyokuhlunga nalawa azolala endaweni yesibili neyesithathu kwiMotsepe Foundation Championship.
Njengamanje iSuperSport United iyona esendaweni ka-15 ngamaphuzu angu-23 emidlalweni elinganayo.
Njengoba leli qembu laseTshwane lisadlale imidlalo engaphansi kunamaqembu amaningi angaphezu kwalo, lisekhona ithemba lokuthi lingase lizitakule liweqe amaqembu afana neCape Town City neRichards Bay.
I-Citizens isendaweni ka-14 ngamaphuzu angu-24 emidlalweni engu-25, kanti iNatal Rich Boyz isendaweni ka-13 ngamaphuzu angu-24 emidlalweni engu-24.
La maqembu azotholana phezulu eKing Zwelithini Stadium, eMlaza, ngoLwesihlanu ngo-7.30 ebusuku.
Womabili azobe ehlose ukuvuka azithathe njengoba athola isibhaxu kweyakamuva yeligi. IBay yanqotshwa AmaZulu FC ngo 1-0, iCitizens yaguqiswa iSekhukhune United ngo 2-1.
Ukuhlala kweChippa United endaweni yesishiyagalombili ngamaphuzu angu-29 kuchaza ukuthi yona namanye amaqembu ayilandela eduze, iLamontville Golden Arrows enamaphuzu angu-28, iMagesi FC (26) neMarumo Gallants (26), nabo abaphephile ezembeni.
I-Gallants izodudulana ne-Arrows eDr Molemela Stadium, eBloemfontein, ngoMgqibelo ngo-3 ntambama, iChippa ibhekane neKaizer Chiefs eNelson Mandela Bay Stadium ngoMgqibelo ngo-5.30 ntambama.
Umqeqeshi weGallants, u-Abdeslam Ouaddou, ezakhe eziwashiswe ijezi yi-Orlando Pirates ngo 1-0 kowandulela owamanqamu eNedbank Cup ngempelasonto, usebheke ukuthi balwele ukugcina indawo yabo esigabeni esiphezulu.
"Ngeke sililahle ithemba, sisazoqhubeka sizabalaze emidlalweni yethu esisalele yePSL (Premiership) okuyiyona esesizibophezele ngokugxila ngokuphelele kuyona ukuze sihlenge iqembu ezembeni,” kusho u-Ouaddou.
"Asiphephile ngoba igebe phakathi kwethu namaqembu aphansi kwi-log amaphuzu amabili noma amathathu. Izinto zingashintsha ngokushesha ngomdlalo owodwa noma emibili.
"Sidinga okungenani ukunqoba imidlalo emibili kule esisalele, okubalwa nalo esiyowudlala neGolden Arrows nayo edinga amaphuzu njengathi."
IMagesi FC izogadulisana neTS Galaxy eSeshego Stadium ngeSonto ngo-3 ntambama lapho izobe ibheke ukunqoba khona okwesine kulandelana kwiBetway Premiership.