Kaizer Chiefs (1) 1
Chippa United (0) 0
IKaizer Chiefs iqinisekise ukuthi abalandeli bayo bazongena bemamatheka onyakeni omusha ngokuguqisa iChippa United emdlalweni wokugcina wonyaka weBetway Premiership obuseMoses Mabhida Stadium, eThekwini, ngeSonto ebusuku.
Igoli eliweze Amakhosi livalelwe nguMduduzi Shabalala ngomzuzu wokugcina wesiwombe sokuqala.
Womabili lawa maqembu abebheke ukuvala unyaka ngegiya eliphezulu ngokuqoqa amaphuzu aphelele.
Amakhosi awuqale ngesivinini umdlalo engena ngokushesha ebhokisini kodwa zifike zivale izitobha zeChippa. Kusebenze unozinti uStanley Nwabali ngomzuzu wesishiyagalombili, evimba ibhola ebelingqomfwe nguYusuf Maart okudingeke ukuthi abhandishwe ekhanda kulandela ukungqubuzana nesitobha seChippa.
IChilli Boys ibingaqali iminyakazo etheni kodwa ibibheke ukuhlasela ngokuzuma, ngamabhola amade abethunyelwa kuBienvenu Eva Nga noma ilinde amaphutha enziwa ngabadlali beChiefs.
Umqeqeshi waMakhosi, uNasreddine Nabi, ubelokhu eneka izandla, enengwa wukungasondelani kwabadlali bakhe uma bephethe ibhola. Maphakathi nesiwombe sokuqala abalandeli beChiefs nabo bese beqalile ukuvungama ngenxa yokuhluleka kwabadlali baphambili ukufaka ibhola ezindaweni ezifanele uma sebengasebhokisini noma phakathi kulona.
Kwale kancane ukuthi imizamo yezikaNabi igcine iphumele ngomzuzu ka-42 ngebhola ebelikhahlelwe nguWandile Duba ekude, kwaphinde kwalamula uNwabali ondize emoyeni walichithela ngaphandle.
Kugcine kuzilungele sekusele amanenjana kuyiwe ekhefini ngesikhathi uShabalala edlubulundela ngakwesokunxele ebhokisini ngaphambi kokulibeka enethini ngonyawo lwesokunxele.
Abaqeqeshi beChippa benze izinguquko ezimbili ngesikhathi kubuywa ekhefini, befaka u-Elmo Kambindu noSirgio Kammies ezikhaleni zikaXolani Sithole no-Andile Jali.
Laba badlali bafike balikhuphula izinga enkundleni njengoba iChilli Boys ibisiqala ukubonana kangcono enkundleni.
Ibhola ebelishaywe nguThabang Malaoa ngekhanda ngomzuzu ka-58 liphume eceleni kwepali, kwathi ebelingqomfwe nguSinoxolo Kwayiba ngoka-61 lashaya i-crossbar lase liwela ezandleni zikaBruce Bvuma.
UBvuma uphinde waqinisekisa ukuthi ezakhe ziphuma zingenamyocu okokuqala kule sizini evimba ishodi ebelidedelwe uGiovanni Philander ngomzuzu ka-86.
IChiefs izosonga u-2024 isendaweni yesikhombisa kwi-log ngamaphuzu angu-15 emidlalweni engu-10, kuthi iChippa ilale kweyesishiyagalolunye ngamaphuzu angu-14.
Amakhosi azobuyela enkundleni ngoJanuwari 5 eseyogadulisana neCape Town City eKapa. IChilli Boys isiyoze ibhekane neRoyal AM eGqeberha ngoJanuwari 11.