SIBUSISO MDLALOSE
I-ETHEKWINI Coastal neCherrians FC yiwona maqembu azotholana phezulu kowamanqamu weSolezwe Soccer Cup, eGlebe Stadium, eMlaza, ngeSonto ntambama.
IThekwini Coastal izibekisele indawo kowamanqamu ngokuguqisa i-United XI ngo 4-3 sekukhahlelwa amaphenathi, kwathi iCherrians yafinyelela kowamanqamu ngokushaya iMolweni FC ngo 2-0 komunye umdlalo wowandulela owamanqamu.
Kwabesifazane iKwaMashu Ladies neDUT yiwona maqembu azodlana imilala kowamanqamu.
IKwaMashu Ladies ifinyelele kowamanqamu ngokushaya iMolweni Ladies ngo 2-1 kowokuqala wowandulela owamanqamiu, kwathi iDUT yashaya iToti Ladies 3-2 kowesibili wowandulela owamanqamu.
Umdlalo wokuqala wamanqamu webhola labesifazane phakathi kweKwaMashu Ladies neDUT, uzodlalwa ngo-10 ekuseni.
Kuthi oweThekwini Coastal neCherrians ube ngo-1 ntambama.
Le ngqophamlando yomqhudelwano oyingxenye yemigubho yephephandaba Isolezwe yokuqeda iminyaka engu-20 lasungulwa, ihamba nesamba sikaR50 000 ozohlukaniswa ngamaqembu adle ubhedu kwabesilisa nabesifazane.
Iqembu elizodla ubhedu kwabesilisa lizokhala lemuke noR20 000 owukheshi, kuthi kwabesifazane elizodla umhlanganiso lihambe noR10 000, elizophuma isibili lithole umthobanhliziyo kaR5 000.
IThekwini Coastal kaLindani "Mantaye" Shezi yiyona ethwelwe ngeqoma kowamanqamu kwabesilisa.
Kwabesifazane kubukeka zindala zombili phakathi kweKwaMashu Ladies neDUT Ladies.