ISIKHULU esiphezulu seSwallows, uSipho Xulu, sivuma ukuthi basathungatha umnyombo wokungenzi kahle kule sizini yeDStv Premiership.
ISwallows FC, ebingomakoti kwiligi ngesizini ka-202/21, ifike kwezwakala ikakhulukazi emzuliswaneni wokuqala.
Baningi akade bengayiniki lutho kodwa yafike yenza kahle. Okufakazela lokho ikwazile ukuqeda namaqembu amathathu aphezulu kwaze kwaba uyaphela umzuliswano wokuqala.
Izinto ziqale ukubheda emzuliswaneni wesibili, kwaqala ukugqoza kokuthola amaphuzu agcwele, idlala imidlalo eminingi ngokulingana.
Emdlalweni wokuqala kwisizini ka-2021/21 Izinyoni zibuyise ithemba zinqoba kuMaZulu ngegoli elilodwa eqandeni.
Ziphinde zashaya i-Orlando Pirates ngo-2-1 kuma-quarterfinal eMTN8.
Ngemuva kwale mpumelelo kazikaze zinqobe nowodwa kwiligi.
Zisendaweni ka-13 kwi-log ngamaphuzu ayisishiyagalombili emidlalweni eyishumi.
Zihlulwe kwemine, zadlala ngokulingana kwemihlanu.
Ngenxa yalokhu, izikhulu zaleli qembu zigcine zinika umqeqeshi, uBrandon Truter, ikhefu lesikhashana. Izintambo zibanjiswe iphini lakhe, uSimo Dladla, ezibhede kakhulu kunakuqala izinto ngaphansi kwakhe.
UXulu utshele Isolezwe ukuthi namanje basalwa nokuthola ukuthi iyiphi inkinobho engeyinhle eyachofozeka njengoba izinto zinje.
"Ngeke ngiqambe amanga, kasibuthi quthu ubuthongo, sizama ikhambi lokunyukela endaweni ezobuyisa isithunzi seqembu. Sithe uma sihlala phansi sabona ukuthi empeleni inkinga yaqala emzuliswaneni wesibili kwisizini edlule. Kukhona lapho esachofoza khona kungafanele. Okusijabulisayo ukuthi sidlala ibhola elihle, maduze izinto zizobuyela esimeni," kubeka uXulu.
Uqhube wathi kuyabaphoqa ukuthi kule midlalo emihlanu yokugcina, yokusonga umzuliswano wokuqala weDStv Premiership, baqoqe amaphuzu agcwele.
"Kushuba kakhulu emzuliswaneni wesibili. Yebo, ngiyavuma kasenzanga kahle kowokuqala kodwa kule midlalo emihlanu esele yokuqeda umzuliswano wokuqala sisenalo ithuba lokwenza kahle. Awamaningi amaphuzu asihlukanise namaqembu angaphezu kwethu. Uma sikwazile ukwenza lokhu, engikushoyo singaya emzuliswaneni wesibili sisendaweni ehloniphekile.“
NgeSonto iSwallows izodlala neTS Galaxy. Lo mdlalo uzolandelwa oweKaizer Chiefs, Maritzburg United, Baroka neMarumo Gallants.
UXulu uveze nokuthi kuyabaphoqa ukuqinisa isikwati sabo kwiwindi elilandelayo lokuhwebelana ngabadlali.
"Sisazoba nomhlangano esizobhunga kuwo kabanzi ngokuqinisa iqembu. Vele sesinalo uhlu lwabadlali esifuna ukuqinisa ngabo iqembu lethu. Ngicela abalandeli bethu bakhululeke, maduze konke kuzocaca,“ kusho uXulu.