OMUNYE wabahleli beWard 19 Grassroots Football Festival ka-U-13 no U-15, Festival, eMbali, eMgungundlovu, ukholwa wukuthi ibhola lingathuthuka eNingizimu Afrika, uma kungakhuthazwa imiqhudelwano ecobelela abantu abasha ngolwazi lwebhola, ukuziphatha nenhlonipho esikhundleni sokugxila emiqhudelwaneni ebeka imali phambili.
UZeph Mthembu oyinkakha yaMaZulu FC, ne-African Wanderers, nowake waba yiphini lomqeqeshi weqembu lesizwe lika-Under 17, Amajimbos, ungomunye wabahleli be-Ward 19 Grassroots Football U-13 and U-15 Festival, ebisenkundleni yaseNdishini, eMbali, eMgungundlovu.
Lo mqhudelwano webhola obungempelasonto, ubuhlanganisa amaqembu aseWard 19, eMbali. Bekuhlelwe izigcawu zokucobelela abantu abasha ngolwazi lokudlala ibhola ngendlela efanele kubadlali abasakhula baka-U-13 no-U-15, abangu-78. Baklonyeliswe ngezitifiketi zokuba yingxenye yomqhudelwano, oqalwe ngoJulayi nonyaka.
Ngokusho kukaMthembu, inhloso yomqhudelwano ukufundisa abadlali abancane ngokubaluleka kokudlala ngendlela enobulungiswa (fairlplay), ukubekezelelana enkundleni, nenhlonipho.
“Imiqhudelwano eminingi esiba nayo emalokishini, nasemakhaya ivame ukubeka phambili okuzonqotshwa ngamaqembu asuke ebambe iqhaza, okungaba imali noma izinkomo, nezimbuzi ezizozuzwa ngabanqobile.
“Lokho kwenza abadlali bethu bakhule nomqondo wokuthi kufanele badlalele ukunqoba ngayo yonke indlela, ukuze kuzuzwe umklomelo osuke ubekiwe. Kanti yikho okugcina kuholele ekukokotelweni kweminyaka yabadlali yobudala, nokuyinto okungafanele ngabe bafundiswa yona besakhula.
“Kulo mqhudelwano siba nezigcawu zokucobelela abadlali abasebancane ngolwazi lwebhola, okuqukethwe ezifundweni ezenziwa ngabaqeqeshi abafuna i-D layisense, okuyi-agility, co-ordination ne-balance, okuyizinto ezibalulekile kumdlali osakhula,” kuchaza uMthembu.
Uchazile ukuthi umqhudelwano ugunyazwe wuMsunduzi Local Football Association.
“Kulo mqhudelwano siyaye simeme nabazali ukuthi babe yingxenye yawo ukuze bezobuka izingane zabo. Okuyinto esiyigqugquzela kakhulu ukuthi iqhubeke yenzeke kulo mqhudelwano ngezimpelasonto ngoba isikhathi esiningi abazali bendlu empisholo abakukhuthalele ukuya ezinkundleni beyobuka, bakhuthaze izingane zabo, yinto eyenziwa ngabezinye izinhlanga.
“Lolu hlelo luphinde lunike ithuba abaqeqeshi bendawo abaneziqu zokuqeqesha, ikakhulu izinkakha zethu zebhola, ekucobeleleni ngolwazi lwebhola abadlali bethu abasakhuliswa.
“Inhloso yethu wukuthi lolu hlelo lukhule lungagcini kuphela ku-Ward 19, eMbali, kodwa lusabalale nesifunda sonke saseMgungundlovu nasezingeni lesizwe saKwaZulu-Natal, ukuze kuthuthukiswe ngendlela efanele abadlali bethu abasakhula,” kuqhuba uMthembu, othe bakha ubudlelwano namaqembu ePremier Soccer League (PSL), asesifundazweni ngabadlali abacijwa ngaphansi kwalolu hlelo.