AMAZULU aphinde aphefumula ngezithukuthuku zabagadli bawo beholwa nguFrank Mhango benquma iCape Town City ngo 2-1 koweDStv Premiership eMoses Mabhida Stadium, eThekwini ngoMgqibelo ebusuku.
Bekungokwesibili emidlalweni emithathu kuqale isizini ka-2022/2023 AmaZulu ecosha amaphuzu amathathu.
UMhango, ngeledlule oshaye igoli wakha elinye esuka ebhentshini, uwuqalile umdlalo efolose noBongi Ntuli no-Augustine Kwem.
Igoli lokuqala livalelwe nguye uKwem, owudlale wonke umdlalo kanti elesibili livele naye uMhango ejoyina abagadli abahamba phambili ngamagoli kule sizini.
Elokubika igoli lishaywe nguKhanyisa Mayo naye njengoMhango noPeter Shalulile weMamelodi Sundowns, onamagoli amabili.
Baholwa ngu-Andre de Jong weRoyal AM ngamathathu.
Bekungokwesibili AmaZulu enqoba umdlalo ekubeni kuyiwo angenelwe yigoli kuqala.
Enze okufanayo nakwiSuperSport United ngeledlule nayo khona eMoses Mabhida.
“Sifuna ukuyenza isigodlo sethu le nkundla. Asifuni amaqembu aze angenwe wumkhuba wokuthi azofika la ezothatha amaphuzu,” kushaya ngonyawo umqeqeshi waMaZulu uBrandon Truter kwiSuperSport TV ngemuva komdlalo.
AmaZulu abuyela enkundleni ngoLwesihlanu lapho ezobhekana khona neSwallows FC eDobsonville Stadium.
ICity, engakanqobi kule sizini, isingatha iMaritzburg United e-Athlone Stadium ngoLwesibili ngo-7.30 kusihlwa.
U-Abbubaker Mobara ube ngumdlali ovelele osukwini.
UMpho Makola, ongene esuka ebhentshini ngesiwombe sesibili, uphume ngekhadi elibomvu ngemuva kokudlalisa kabi uMakhehleni Makhaula usuyophela umdlalo.
@malbingo