AFIKE kwazwakala amaqembu angomakoti kwiHollywoodbets Super League, iLindelani Ladies ne-University of Fort Hare, eqoqa amaphuzu aphelele emidlalweni yawo yokuvula isizini esigabeni esiphezulu sebhola labesifazane kuleli.
La maqembu akhushulelwe kwiSuper League kulandela ukufika kwawo kowamanqamu weSasol League National Championships ngesizini edlule, owagcina unqotshwe yiFort Hare kumaphenathi.
ILindelani yaKwaZulu-Natal, iqumbe phansi iThunderbirds Ladies ngo 3-0 ePrincess Magogo Stadium ngoMgqibelo ntambama. Amagoli avalelwe uNomfundo Xulu noMbalenhle Tenza, elinye laqhamuka ngesikhathi umkhonto kaChwayita Zimba ugwaza ekhaya.
IFort Hare nayo ebidlalela ekhaya eDavidson Stadium, inqobe iTUT Matsatsantsa ngo 2-1. Amagoli eqembu lase-Eastern Cape ashaywe nguNosikho Magqaza noKesha Hendricks, eleTUT lavalelwa nguTshogofatso Motlogelwa.
Ompetha iMamelodi Sundowns baqale ukuvikela isicoco sabo ngegiya eliphezulu beguqisa iRoyal AM ngo 4-0 eLucas Moripe Stadium, e-Atteridgeville.
Amagoli amabili ashaywe nguBoitumelo Rabale, amanye aqhamuka ku-Andisiwe Mgcoyi noNthabiseng Majiya, obeqala ukudlala eqenjini lakhe elisha.
Umdlali wamaBrazilians wasemuva uBambanani Mbane, owalimala edlalela iqembu lesizwe iBanyana Banyana eNdebeni yoMhlaba ngo-Agasti nyakenye, ubesebhentshini kodwa wagcina engafakwanga.
I-University of Western Cape eqede endaweni yesibili ngesizini edlule, ayiqalanga ngomfutho ofanayo ngesikhathi ibanjwa Copperbelt Ladies ngo 2-2 eBaroka Global Stadium, eLimpopo.
Kuyiwe ekhefini iqembu lasekhaya lihamba phambili ngegoli elishaywe nguThandi Rameri, i-UWC yabuya kwesesibili ngamagoli ka-Amogelang Motau noPhilisa Njambane, ngaphambi kokuthi uRethabile Ndlovu atholele iCopperbelt elokulinganisa.
Komunye umdlalo obubhekwe ngabomvu obuphakathi kwamaqembu okulindeleke ukuthi abe sembangweni wesicoco, iJVW FC neTS Galaxy Queens obuse-UJ Stadium eSoweto, kukhonye iRockets ngo 2-0.
Amagoli eGalaxy ashaywe ngabadlali bayo abanamava, uBusisiwe Ndimeni noMamello Makhabane.
Imiphumela yemidlalo yeHollywoodbets Super League: Lindelani Ladies 3 - 0 Thunderbirds Ladies, University of Fort Hare 2-1 TUT Matsatsantsa, Durban Ladies 2-0 University of Pretoria, Copperbelt Ladies 2-2 University of Western Cape, JVW FC 0-2 TS Galaxy Queens, Richmond United 2-2 City Lads, First Touch 1-4 University of Johannesburg, Mamelodi Sundowns Ladies 4-0 Royal AM.