Nakuba kumbhedele uRyan Mphahlele emjahweni wokuqala webanga lika-1500 kuma-Olympic Games kodwa umqeqeshi wakhe, u-Elvis Khoza, usakholelwa ekutheni umgijimi uzofinyelela kowamanqamu.
Lo mgijimi waseTembisa, eGoli, ulale endaweni yesi-12, ngesikhathi esiwu-3:38.48. Akuhambanga kahle nakumkhaya wakhe, uTshepo Tshite njengoba eqede kweyesi-13, ngesiwu-3:36.87.
Abagijimi bazothola elinye ithuba ngoMgqibelo lokudlulela emjahweni owandulela owamanqamu. Bazogijima ngo-7.15 ebusuku.
UKhoza oqale ukucija uMphahlele eseneminyaka ewu-11, utshele leli phephandaba ukuthi usakholelwa ekutheni umgijimi uzofinyelela kowamanqamu.
"URyan ushawe ukuthi akaqalanga kahle. Besazi vele ukuthi kuzoba nzima. Ngisazokhuluma naye, sibonisane ngokumele akwenze emjahweni we-repechage. Kumnyama kubomvu siyaya kowamanqamu," kubeka uKhoza obezwakala ekhululekile.
UMphahlele uye eParis engomunye wabathwelwe ngeqoma ngenxa yempumelelo ayitholile selokhu kuqale unyaka.
Ekuqaleni kwawo ulale indawo yokuqala kwi-Elite Indoor Track Miramas Meeting, eFrance, ngesikhathi esiwu-3:36.57.
Ukuphindile lokho kwiBelgrade Indoor Meeting, eSerbia ngesiwu-3:37.19.
Kwi-Oslo Bislett Games, eNorway, uqede kweyesi-12, ngesiwu-3:33.85.
Ngaphambi kokuya eFrance, uvale ngeXXII Commonwealth Games yaseGreat Britain enze kuyo esiwu-3:34.66.
UKhoza uveze ukuthi noma kungenzekani eParis, kodwa lifezekile iphupho likaMphahlele lokumela iNingizimu Afrika kuma-Olympic.
"Eminyakeni edlule saphoxeka ngenkathi sihluleka ukuya kuma-Olympic ayeseTokyo. Sazitshela ukuthi sizosebenza kanzima ukuze siye kwawakulo nyaka. Nakwazayo siyaya. Okuhle ngoRyan uwumgijimi ohlale elenyusa izinga".
Khonamanjalo, intokazi yakuleli, uTatjana Smith iphinde yajabulisa abakuleli inqoba indondo yesiliva kwi-200m breaststroke, emuva kwalokho yamemezela ukuthi isiyahoxa ekubhukudeni. Ubhedu ludliwe uKate Douglas waseMelika. Ezinsukwini ezedlule, uTatjana unqobe eyegolide kwi-100m Breaststroke. Elakuleli selinezindondo ezine. Eyegolide neyesiliva nezimbili zethusi.
Ihlelwe kanjena imijaho namuhla ngoMgqibelo nangeSonto:
Namuhla ngoMgqibelo:
Ngo-11.10 am: Sekgodiso (800m women's, repechage).
Ngo-11.45 am: Akani Simbine, Benjamin Richardson noShaun Maswanganyi (100m men's, heat).
Ngo-7.15 pm: Tshite noMphahlele (1500m men's repechage).
Ngo-7.35 pm: Blignaut (shot put men's, final).
Kusasa ngeSonto:
Ngo-11 am: Jovan van Vuuren noCheswill Johnson (long jump men's qualification).
Ngo-12.35 am: Zeney Geldenhuys noRogail Joseph (400m hurdles women's heat).
Ngo-7.05 pm: Lythe noZakithi Nene (400m men's heat).
Ngo-8 pm: Simbine, Richardson noMaswanganyi (100m men's, semifinal).
Ngo-8.35: Sekgodiso (800m women's, semifinal).
Ngo-9.10 pm: Tshite noMphahlele (1500m men's, semifinal).
Ngo-9.50 pm: Simbine, Richardson noMaswanganyi (100m men's, semifinal).