ISISHOSHOVU ekuthuthukisweni kwebhola labesifazane, uMary Jane Sokhela, sibonge uMnyango wezeMidlalo ngokugcina uyiphendulile imithandazo yabo yeminyaka yokwenzela amantombazane akulesi sifundazwe umqhudelwano ohloniphekile.
Lo sihlalo we-Durban Ladies edlala kwi-Hollywoodbets Super League, ubeyisimenywa esiqavile emcimbini obuseThekwini, kwethulwa iWomen's Month Celebration Tournament ezobe iqala ukudlalwa. Kuzoqhudelana amaqembu awu-18 ayibamba kwi-Sasol Women's League. Kuzodlalwa ngempelasonto kaSepthemba 7-8 endaweni esazoqinisekiswa.
Kulo mcimbi bekukhona noThami Mchunu ongumengameli weKZN Sports Confederation noKwenzokwakhe Ngwenya ongusihlalo weKZN Safa. Kukhale amakhwela kwakikiza abesifazane kumenyezelwa ukuthi iqembu elizodla umhlanganiso lizoklonyeliswa ngo-R70 000, izindondo nomgqomo wenkomishi.
Isibili sizothola u-R35 000, isithathu simuke no-R25 000. Isine sizogoduka no-R10 000 bese kuthi kusukela kweyesihlanu kuya kweyesishiyagalombili kube u-R6 000 iqembu ngalinye. Elizoqeda kweyesishiyagalolunye lizothola umthobanhliziyo ka-R2 000.
Ngaphandle kwale miklomelo, wonke amaqembu azoba ingxenye azithola u-R2 000.
UMary Jane ongumunye owabamba iqhaza ekusungulweni kweBanyana Banyana, uveze ukuthi bakucela ngo-2017 ukwenzelwa lo mqhudelwano kodwa kwacweba iziziba.
"Asibonge emnyangweni ngokugcina uwenzele amantombazane ethu umqhudelwano ohloniphekile. Ngiye ngizibuze ukuthi kungani abantu abaphethe imali behlala bebona engathi bayayilahla uma beyifaka ebholeni labesifazane. Kumele bakwazi ukuthi nathi siyayidinga," kushaya ngamafuthi lesi sikhulu.
Inkulumo yaso inanelwe uNgwenya othe beyi-Safa bebekhala ngokuzitshwa kwamaligi abo ekubeni umnyango uwenzela iPremiers Cup adlala kwi-Premier Soccer League (PSL).
"Besizibuza ukuthi ngabanjani laba abanikwa imali ekubeni nathi sine-ABC Motsepe League ne-Sasol namanye amaqembu ethu adlala kwi-Hollywoodbets. Siyabonga ukuthi kugcine kulungile. Le midlalo siyenze ngo-Agasti ngoba sihlonipha abesifazane," kubeka uNgwenya.
Uthe basalinde umnyango ukuthi ubazise ukuthi le midlalo izoba eThekwini noma eSiyabonga Sangweni Sports Complex, eDondotha, eMpangeni.
Emcimbini wayizolo kuvele nokuthi imidlalo kazwelonke ye-Sasol yokuhlungela ukwenyukela kwi-Hollywoodbets izoba ngo-Okthoba 14-20, eWestern Cape. Lusazomenyezelwa usuku okuzobhekana kulo Ezemvelo ne-Newcastle Chess emdlalweni wokukhipha elizomela iKwaZulu-Natal kwekazwelonke.