Ekugcineni uGcina Makhoba usethole ithuba lokuvikela ibhande le-WBF World Junior Bantamweight ngemuva kweminyaka emibili agcina ukubonakala eringini.
Lo mshayisibhakela wagcina ukubonakala ngesikhathi enqoba leli bhande ehlula ngamaphuzu uRoberto Paradero empini eyayiseDundee, ngoDisemba ka-2022.
Inkakha yesibhakela nophromotha, uFrancois "White Buffalo" Botha, useqhathe uMakhoba noGenesis Libranza wasePhillipines emqhudelwaneni ohlelelwa ukuba seWild Coast Casino, eMbizana, ngo-Agasti 30.
UMakhoba waseSibongile, eDundee, uveze ukuthi uyajabula ukuthi ekugcineni uzolivikela leli bhande njengoba besekuyisikhathi agcina ukubonakala eringini.
"Impela kunjalo abantu bazongibona eringini ngenyanga ezayo. Amalungiselelo ahamba kahle kanti ngimagange ukuthi ngithathane kushunqe uthuli nalo mbhemu wasePhillipines. Ngifuna ukulivikela ngesitayela leli bhande kwazise ngizobe ngilwa phambi kwabantu bakuleli," kusho uMakhoba.
Imbangi azobe ebhekene nayo, izobe seyilwa kwesithathu kuleli. ULibranza wehlulwa wuMoruti "Babyface" Mthalane ngomcacamezelo womlalisa phansi ngomzuliswano wesine empini yebhande le-IBO Flyweight eWembley Arena, eGoli ngo-2017.
Esefika okwesibili kuleli uLibranza, wagoduka edumele ehlulwa wuPhumelela “The Truth” Cafu empini ye-IBF International Junior Bantamweight e-Orlando Communal Hall, eSoweto ngonyaka odlule.
Impi ezobhula amazolo izoba phakathi kukampetha wakuleli kwi-Super Middleweight u-Asemahle Willem noSinamiso Ntuli waseMnambithi.
UNtuli uzobe ezama ukuthatha ibhande likazwelonke okwesibili njengoba ngonyaka odlule eGoli wahluleka ukulihlwitha kumpetha we-Middleweight uJohn Bopape waseGoli.
UNtuli wawina ibhande laKwaZulu-Natal ehlula u-Andile Mntungwawo ngomngqimuzo womlalisa phansi emzuliswaneni wesihlanu empini eyayise-Olive Convention Centre, eThekwini.
UWillem, odabuka esigodini sakwaChintsa, e-Eastern Cape, ugcine ukubonakala eringini ngesikhathi ebhekene noCowin Ray owamgingqa ngomzuliswano wesithathu eKempton Park, eGoli eminyakeni emibili edlule.
Uphromotha uBotha, uthe kuyamjabulisa ukuthi uhambise isibhakela eWild Coast Casino kwazise abantu bakuleya ndawo abavamisile ukubuka izimpi.
Ngesikhathi esewumshayisibhakela uBotha wanqoba amabhande e-IBF ne-WBF esisindweni sosondonzima.
Wake watholana phezulu nabashayisibhakela abanohlonze okubalwa kubona oMike Tyson, Evander Holyfield, Lennox Lewis, Shannon Briggs noWladimir Klitschko.