INKAKHA yomrepha wakuleli ebhadla ejele, uThulani Ngcobo, edume ngelikaPitch Black Afro ithi yaphoqwa ngamaphoyisa ukuvuma ukuthi yabulala inkosikazi yayo.
UPitch Black Afro udalule lokhu ngesikhathi evela enkantolo yemantshi eGoli ngoLwesibili njengomangalelwa ecaleni lokubulawa kwenkosikazi yakhe uCatherine Modisane eYeoville ngo-2018 kanye nelinye icala lokuphazamisa ukusebenza kwengalo yomthetho.
Ngokommeli wakhe uRian Greylin, lo mculi wafakelwa ingcindezi yiphoyisa lesilisa angalazi igama athe londlekile ngokomzimba.
“Ummangalelwa uthe wayeboshwa ngozankosi, izandla zakhe ziboshelwe ngemuva wahlaliswa esitulweni. Uthe lapho wabe esefakelwa ingcindezi yokuthi avume icala lokubulala,” kusho uGreylin.
UGreylin uthe imenenja kaPitch Black, uBheki Mlambo, nayo yalibona leli phoyisa elondlekile lifakela uPitch Black ingcindezi yokuthi avume icala.
Umphenyi wecala u-Officer Patience Qilingana wazise inkantolo ukuthi lo mrepha waboshwa nguyena kodwa ngesikhathi esefuna ukukhuluma wambizela umphathi siteshi, ambize ngo-captain Pila.
“Ngangingeyona ingxenye yabaphenyi ababembuza ngayesolwa ngakho,” kusho uQilingana.
Uthe ngesikhathi efika uPila akazi kwenzekani ngoba wabuyela esiteshini samaphoyisa yena.
“Angazi kwenzekani ngoba ngangingasekho,” usho kanje.
UPitch Black uthe amaphoyisa ayemhlaba ngemibuzo ngendlela eyayimfakela ingcindezi.
UQalingana uthe uPitch Black wacela ukukhuluma nabaphenyi kulandela ukutholwa kwethawula elimanzi elalinegazi lifihlwe phakathi kombhede nodonga endaweni ababelele kuyo. Uthe yilapho akhetha khona ukumbizela umphathisiteshi kodwa akabanga yingxenye yokuphekwa ngemibuzo kwakhe kulandela ukuphuma egumbini ayekulo.
Ngesikhathi kuhlatshwe ikhefu enkantolo uPitch Black ubukeke esengxoxweni eshubile nommeli wakhe ebukeka ecikekile. Enkantolo bekukhona amalungu amabili omndeni wakhe acele ukungaphawuli njengoba ethe abukho ubufakazi obutheni abangaphawula ngakho.
UPitch Black uboshwe nyakenye ngoJanuwari 19 esolwa ngokubulala inkosikazi yakhe ngoNcibijane ka-2018. Ngokwemibiko uPitch Black wayehleli kwiBed and Breakfast kulandela ukuqashwa ukuthi ayonandisa ePort Elizabeth naseKimberly.
UMshushisi uMatshiliso Moleko ucele ukuthi lihlehliswe icala ngaphambi kokuthi kubizwe ufakazi olandelayo. Icala lisaqhubeka.
The Star