AMALUNGU omphakathi aseDark City, ngaseMthwalume, ngaphansi kukaMasipala waseMzumbe, agcwele izinkalo athungatha umfundi oneminyaka eyisishiyagalombili, okuthiwa ugcine ukubonakala izolo ngemva kokuphuma kwesikole.
Umndeni kaSinethemba Ngcece (8), ofunda ugrade 3 esikoleni samabanga aphansi Emakhosini Primary esisendaweni, udunguza oswini ngokwehlele indodakazi yawo okuthiwa izolo ayizange ifike ekhaya ngemva kokuphuma kwesikole.
UNksz Nobuhle Ngcece, unina kaSinethemba ngesikhathi ekhuluma neSolezwe, ubesesiteshini samaphoyisa eHibberdene, eyobika udaba lokulahleka kwendodakazi yakhe.
“Asazi ukuthi yini emvelele. Abanye ababonile kuthiwa ubonakale egibela emotweni ebomvu kwaba ukunyamalala kwakhe,” kubalisa unina wengane.
Uthe uSinethemba ubehlala lapho kuzalwa khona uyise emzini okhona endaweni. Umndeni ucela ukuthi noma ngubani onolwazi olungasiza ekutholakaleni kwengane alekelele, njengoba usufakile nasezinkundleni zokuxhumana ucela ukufuniswa ilungu lawo.
