BATHEMBISA ulozolo lweziqephu ezizobe zixoxa ngamathenda abomdlalo omusha UNikiwe, ongene esikhaleni seDurban Gen ku-e.tv. IDurban Gen bekuwumdlalo obukhuluma ngempilo yasesibhedlela nobuqoshelwa eThekwini, nawo ubunesasasa. Abaningi bakhalile ngokuphela kweDurban Gen abese bejwayele ukuchitha ngayo isizungu njalo ntambama.
Umdlalo UNikiwe wethulwe eStar Hotel, eDurban North, kuleli sonto. Abanikazi bomdlalo, uThomas Gumede noLungile Radu bathe umdlalo wabo uzoshisa kuze kube sekugcineni. UNikiwe uzoqala ukubonakala kusasa ngo-6.30 ntambama ku-e.tv.
Lo mdlalo obhekwe ngabomvu uhlasela kakhulu ngabalingisi abangomakadebona endimeni yezokulingisa. Phakathi kwabo kukhona uMuzi Mthabela okumanje ubonakala kwiGenerations: The Legacy, edlala indawo kaNkosiyabo Cele. Kukhona no-Israel Zulu, Lorcia Cooper noKenneth Nkosi. Umlingisi ophambili wuLungile Mpangase kanti kukhona noZandi Nhlapho oke wagqama kakhulu edlala kwiMbewu kanti wayethula izinhlelo kudala.
Lo mdlalo omusha kuvela ukuthi uqoshelwa eSoweto kanti bazimisele ukufundisa okuningi ngempilo yabantu bamathenda. UGumede ongomunye wabanikazi bomdlalo naye oke walingisa kakhulu, uthe bayajabula ukuthola ithuba. Uthe ngeke babadumaze abantu, bazimisele ngokubashiya becela impinda ngomdlalo wabo.