USIHLALO wekomidi elibhekele ezomnotho kwi-ANC, uMnuz Enoch Godongwana, uthi inhlangano yenza konke okusemandleni ukuthuthukisa umnotho waseNingizimu Afrika yize inamaphutha ayo.
UGodongwana, obekhuluma nabezindaba esithangamini ebesiseGoli izolo, uthe i-ANC izimisele ukulwa nenkohlakalo nokuqinisekisa ukuthi izinkampani zikahulumeni ziphethwe kahle.
Uveze ukuthi abatshalizimali bayathemba ukuthi umnotho uzosimama ngoba bafake * $1.3 billion ngo-2017 kwathi ngo-2018 bafaka uR$7.1 billion.
“Kuningi okwenziwa yi-ANC ukuletha impilo engcono kubantu bakithi, engingabala kukho ukwakhiwa kwezindlu eziwu-4.7 million, ukufakela abantu abayisishiyagalombili kwabawu-10 ugesi. U-90% wabantu unamanzi ahlanzekile. Ngo-1994 safica izwe elingenamali, abantu bakithi bebandlululwa bengakwazi ukungena kwezomnotho kodwa i-ANC ikushintshile konke lokhu,” kusho uGodongwana.
Uthe yize i-ANC inezingqinamba kodwa izimisele ukuzilungisa, ilwe nenkohlakalo iqhubeke nokuvulela abantu amathuba omnotho.
Odabeni lomhlaba uGodongwana uthe i-ANC ayikashintshi ekutheni abangenamhlaba kufanele bawuthole futhi kuzoqalwa ngokuthi kukhishwe okahulumeni.
Uthe akunambithisiseki ukuthi iBhange loMbuso liphethwe ngosomabhizinisi ngoba akwehli kahle lokhu.
“Kasinankinga nokuthi lizimele kodwa kufanele lihlomulise abantu bakithi. Udaba lokuphathwa kweBhange loMbuso luyadingidwa yonke indawo futhi lusazoqhubeka ngoba sifuna likwazi nokudala amathuba omsebenzi,” kusho uGodongwana.
Uthe abafuni ukuphazamisa ukusebenza kweBhange loMbuso kodwa kufanele kubhekwe okwenzeka kulo.
Uveze ukuthi akuyona inkinga ukuhlukaniswa kwe-Eskom iminxa emithathu ngoba akuyona into entsha.
“Sayixoxa indaba yokuthi kube nezinhlobo zamandla ahlukene. Isibonelo owamalahle, owenuzi, okhiqizwa ngabazimele. Akuyona into entsha ukuthi i-Eskom ibe neminxa ehlukene futhi siyaxoxa namadlelandawonye ngalolu daba,” kusho uGodongwana.