BABUYELA emabhentshini aseNkantolo eNkulu ePitoli abalisa abahlanu abasolwa ngokujuqa owayengunozinti uSenzo Meyiwa. UMeyiwa owayeyisilomo se-Orlando Pirates neBafana Bafana, wadutshulwa wabulawa ekubo kwentombi yakhe uKelly Khumalo ngo2014.
UMbuso uthi abalisa abahlanu yibona abamkakisa okwenyamazane uMeyiwa ngobusuku kuka-Okthoba 26, 2014 eVosloorus, eGauteng. Abamangalelwa bonke bayawaphika onke amacala ababekwe wona.
Icala lisesigabeni sokuqulwa lapho uMbuso uqhubeka khona nokubiza ofakazi bawo okholwa wukuthi bazosiza ukugojela abamangalelwa.
Phambilini icala laguqa ukuze kunikwe abameli ithuba lokucubungula kahle bonke ubufakazi bese belungela ukuphosa imibuzo kofakazi boMbuso.