LIBEKWE icala lokushayela liphuzile iphoyisa elinguConstable esiteshini saseTwatwa, Ekurhuleni.
Leli phoyisa elibonakale kwi-video esuse umsindo ezinkundleni zokuxhumana, kuthiwa belingagunyaziwe ukushayela imoto yombutho ngosuku lwesigameko.
Amaphoyisa aveze ukuthi enze uphenyo oluqinisekise ukuthi leli phoyisa lisebenzela esiteshini saseTwatwa, lathathelwa izinyathelo ngokushesha.
“Leli phoyisa libekwe icala lokushayela liphuzile nokushayela imoto yombuso ngaphandle kwemvume nelokushayela budedengu. Lizobuye libhekane necala lokuqondiswa ubugwegwe emsebenzini ngalokhu,” kusho uLieutenant Colonel Mavela Masondo okhulumela amaphoyisa eGauteng.