KUZOVALWA imigwaqo eseduze kweNkosi Albert Luthuli International Convention Centre (ICC) njengoba kuza umbukiso omkhulukazi wezokuvakasha, i-Africa’s Travel Indaba.
UMasipala weTheku uthe umgwaqo uWalnut uzobe uvalwe thaqa njengoba kuza umbukiso kanti izimoto ezisuka kuBram Fischer naku-Dr AB Xuma ngeke zikwazi ukuhamba kulo mgwaqo.
Imigwaqo iqale ukuvalwa ngoMsombuluko 6 Meyi kuya kuMeyi 20.
Eminye imigwaqo ezophazamiseka uStalwart Simelane, Samora Machel, Or Tambo Parade, Boscombe Terrace noPlayfair.
Umasipala ucele abashayeli bezimoto ukuthi basebenzise eminye imigwaqo ngalesi sikhathi.
I-Africa’s Travel Indaba izohanjelwa ngabantu abangaphezu kuka-9 000 kusukela ngoMeyi 13 kuya kuMeyi 16.
Kuzobe kukhona osomabhizinisi abancane abawu-120 abazozikhangisa nabanye abavela emazweni awu-26 ase-Afrika.
UColonel Boysie Zungu okhulumela amaphoyisa kaMasipala weTheku uthe ukuvalwa kwemigwaqo kuzoqinisekisa ukuthi i-Africa’s Travel Indaba ihamba kahle.
“Kuzobe kutshalwe amaphoyisa kamasipala kuwo wonke amakhona eTheku. Isimo sizobe sisiqaphe ngeso lokhozi ngoba Indaba ihanjelwa ngabantu abavela emazweni ahlukene. Kuzobe kukhona izikhulu zohulumeni, abathengi bamazwe, izinhatheli nezinye izivakashi,” kusho uZungu.
IMeya yeTheku, uMnuz Mxolisi Kaunda, ithembise ukuthi konke kuzohamba kahle ngoba iTheku linomlando wokuba nemicimbi esezingeni lomhlaba.
Ugqugquzele abantu baseThekwini nabasembonini yezokuvakasha ukuba bamukele izivakashi ngezandla ezifudumele.