UHLELO lokufunda nokufundisa selufana nokuqwala intaba iKilimanjaro esikoleni saseMandeni, eMachibini iTshana High School, ngenxa yesimo esibi isikole esikusona.
Umthombo othembekile nowazi konke okwenzeka kulesi sikole esakhele u-ward 10, uhlebele Isolezwe Ngempelasonto ukuthi isisusa sezinkinga sidalwe yizikhukhula ezahlasela ekupheleni kuka-2022, nezashiya zicekele phansi uphahla lwaso, okwenza ukufunda kungenzeki ngendlela efanele nejwayelekile.
“Leso simo sadala umonakalo omkhulu kakhulu esikoleni, kangangokuthi kwacekeleka phansi cishe wonke amagumbi esikole, kubalwa negumbi eligcina izincwadi zesikole ezisetshenziswa ngabafundi ukufunda. Lokho kuphoqa ukuthi ubuholi besikole buhlale bufaka ama-oda ezincwadi njalo uma kuqala unyaka, nazo ezifika zingeneli wonke umfundi.
“Okunye futhi wukuthi njengoba kwacekeleka phansi uphahla lwesikole, akufundeki kulama gumbi onakala, okwenza ukuthi uhlelo lokufundela komahambanendlwana abafika naboMnyango weMfundo, nalo lungasizi kangako ngoba abafundi abeneli kahle kubona, futhi uma kushisa ilanga kakhulu, abafundi abalawuleki kahle, bekhala ngokushisa,” kulandisa umthombo.
Uqhuba umthombo, udalule ukuthi okunye okufane nokuthela upelepele esilondeni, wukuthi ngonyaka odlule kube nenkinga endaweni, kuqhuma isiphehlimandla sikagesi, okudale ukuthi kungabi bikho ugesi kulesi sikole kusukela ngoJuni nyakenye.
“Lokho nakho kuphazamisa kakhulu izinhlelo zokufunda ngazo zonke izinsuku njengoba njalo uma kunento okumele yenziwe edinga ugesi, kuphoqeleka ukuthi kuthunywe izingane ziyoyenza kwamakhelwane owayenguthisa wakhona kulesi sikole, okubeka impilo yabafundi engcupheni njengoba uma beya lapho abasuke beyogaya amaphepha noma yini okunye, basuke bephethe ama-laptop esikole,” kusho umthombo.
Omunye wabazali bezingane ezifunda kulesi sikole, naye ocele ukungadalulwa, uthe nakuba uMnyango weMfundo uzamile ukulungisa izinto ngokunikela ngamagumbi okufundela angomahambanendlwana, kepha akwanele ukuqinisekisa ukuthi ukufunda kwezingane kuhleleke.
Uthe: “Nokuthi enye inkinga enkulu ekhona wukuthi njengoba lama gumbi okubambisa enganeli wonke umfundi, kukhona abafundi abafunda kuwo lamagumbi angenalo uphahla, esingazi ukuthi kuphephe kangakanani njengoba kungakalungiswa. Nalokhu kukagesi kubi kakhulu njengoba kwenza izinhlelo zokufundisa abafundi zingenzeki kahle, kubalwa nezinhlelo zabafundi baka-matric abafunda ubusuku bonke okungasenzeki.”
Lesi sikole sikweziphasa kahle ku-matric eMandeni kwisekethe yazo, njengoba nyakenye silale endaweni yesithathu ngo-86% kanti futhi eminyakeni emithathu sihlale sikhona ezikoleni ezinhlanu ezihamba phambili kwabebanga lokugcina endaweni.
Ngonyaka odlule besinabafundi abawu-952, nothisha abawu-25.
Imizamo yokuthola ukuphawula kwekhansela lendawo okwakhiwe kuyo isikole, uMnuz Simphiwe Mdunge, kanjalo naboMnyango weMfundo eyisiSekelo, igcine ingaphumelelanga.