UPHITHENE amakhanda umndeni obukele amalungu awo amathathu eminza, ezama ukuhlenga ilungu lomndeni elineminyaka eyisishiyagalolunye, edamini eBalele, e-Utrecht.
Umndeni wakaQoqo ubuzikhiphile ngoMsombuluko ntambama uyongcebeleka ngesikhathi uhlangabezana nenhlekelele okushone kuyo oMnuz Piet Goqo (61), Philani Goqo (26) noSibusiso Goqo (45).
Bobathathu bebezama ukuhlenga umshana obengene edamini elandela elinye ilungu lomndeni ebelibhukuda.
Kuthiwa kuqale kwangena uSibusiso ezama ukuhlenga ingane, waminza. Kwalandela uPhilani naye waminza, kwabe sekungena uPiet naye ominzile.
Kuthiwa ingane ize yahlengwa ngumuntu obedlula ngendlela ebone inhlekelele.
UMnuz Xolani Goqo, uthe basashaqekile, kabakwazi nokuchaza okubehlele ekubeni bebethi bayazijabulisa.
“Kusuka ngo-Okthoba sahlela ukuthi ngaleli langa likaDisemba 30 sizoya edamini sihambe nomndeni wethu wonke siyozijabulisa. Besihleli ngoMsombuluko ntambama sosa inyama nezingane zidlala, kukuhle konke.
Elinye ilungu lomndeni liye edamini liyobhukuda. Lilandelwe yingane kadadewethu eneminyaka eyisishiyagalolunye. Sibonile ukuthi iyaminza ingane. Kungene umfowethu kuqala uSibusiso, wavele wacwila simbuka. Kulandele umshana uPhilani naye wavele wacwila simbhekile. Ngizamile ukungena, ngacela intambo kwabebedoba. Bangibophe ngayo, ngithe ngingena ngezwa ukuthi amanzi ayangenisa ngoba aseduze ne-pump yedamu. Ngicele bangidonse. Umalume obemi eduze kwedamu uvele wathi ngeke abukele izingane ziminza ekhona, wangena ezama ukuzihlenga naye wacwila. Konke lokhu kwenzeka sibuka,” kusho uGoqo.
Uthe basale bekhungathekile. Khona lapho kuqhamuke umuntu ongahlobene nomndeni ozidelile wangena edamini, wakhipha umfana oneminyaka eyisishiyagalolunye esaphila.
“Sisale sishaqekile ngokwenzekile, ukubuka amalungu omndeni ethu eminza phambi kwethu, singakwazi ukuwasiza. Kusihlukumeze kakhulu okwenzekile,” kusho uGoqo.
Uthe lolu suku kade baluhlelela. Owayehamba phambili ezinhlelweni nguPhilani.
UPhilani kuvele ukuthi ubesanda kuqashwa emsebenzini.
Ngo-2017 wathola iziqu zeCommerce eMangosuthu.
Uthe kumuncu nje ekhaya ngenxa yesigameko esibehlele.
“Kunzima ukulala phansi kwezidumbu ezintathu ngesikhathi. Siphithene amakhanda impela ngokusehlele,” kusho uGoqo.
Uthe ngaphezu kwalokhu kabazi ukuthi bazofihla ngani njengoba bebengalindele ukubhekana nesimo esibehlele.
“Imali isebenze ngesikhathi sikaKhisimusi. Manje sibhekene nenkinga yokungcwaba abantu abathathu. Sidinga usizo kwabangafaka isandla, umasipala nosomabhizinisi,” kusho uGoqo.
Okhulumela amaphoyisa KwaZulu-Natal, uCaptain Nqobile Gwala usiqinisekisile isehlo, wathi amaphoyisa ase-Utrecht avule amadokodo amathathu ngokushona kwamalungu omndeni amathathu. Uphenyo lwamaphoyisa lusaqhubeka.