LIZOQALA maduze ukubonakala kwithelevishini iqophamlando ngesitebele somculo esihlonishwayo iKalawa Jazzmee enomlando ocebile.
AboMzansi Magic bamemezele ukuthi isiqephu sokuqala sizobonakala ku-DStv 161 kusukela ngo-Agasti 13 ngo-5 wantambama.
IKalawa Jazmee ithathwa njengengqalabutho kwezomculo kuleli ngoba ikhiqize abaculi abaningi futhi isinesikhathi ikhona endimeni.
Umlando uveza ukuthi iKalawa Jazmee izalwe ngo-1994 emuva kokuhlangana kwezitebele ezimbili. Kwakukhona iKalawa eyayizimele isungulwe ngoChristos, Don Laka, Sebitlo no-Oskido.
Kwakukhona nesitebele iJazmee eyayisungulwe wuJakarumba, Eugene (ababecula kwiTrompies), uMojalefa, uSibiki noMofokeng.
Izitebele ezimbili zaziqhudelana ngesikhathi sakudala kodwa bagcina behlanganile benza isitebele esisodwa esagila izimanga kuleli. IKalawa igcine iyikhaya labaculi ababeshisa izikhotha njengeBoom Shaka, Mafikozolo, B.O.P, Bongo Muffin, Professor, Uhuru, Zonke no-DJ Zinhle.
Kubuye kwavela neBlack Motion, Big NUZ, Busiswa, IVigro Deep nabanye abacui abaningi. Abesiteshi sethelevishini bathe iningi lizobhema likholwe ngoba leli qophamalando likhipha izaqheqhe zomlando.
Bathe kuzobe kukhonjiswa isizini yokuqala kodwa akucacanga noma eyesibili izolandela nini.
