UNGQONGQOSHE wezokuThuthukiswa koMphakathi KwaZulu-Natal, uNkk Nonhlanhla Khoza unxuse abesifazane ukuthi babike izizinda zobugebengu emiphakathini abahlala kuyo.
UKhoza ukusho lokhu ngesikhathi ethamele umgubho woSuku lwabesiFazane ebandleni lamaKhatholika lakwaSanti, iSt Wendolins Parish ngeSonto.
UKhoza uthe omama bayathula bebe bebazi abantu abenza ubugubengu wathi kumele basukume njengoba kwenza abango-1956 abangathulanga balwa nokuphathwa kwamapasi.
Umphathi wesiteshi samaphoyisa saseMariannhill uColonel Muzi Twala uhambe emazwini kaKhoza wanxusa ukuthi umphakathi usebenzisane nabo ekuqedeni ubugebengu kakhulukazi obubhekiswe kwabesifazane nasezizinganeni.
Umholi waleli bandla uFather Nhlanhla Mchunu ebambisene noDeacon Nene bamukele nezipho ebeziphethwe nguKhoza ezizonikwa intsha yabesifazane.
UMchunu uphinde wethula usomabhizinisi uBheka Zulu weSouthern Seas Institute omemezele ukuthi uzothatha abesifazane abasha abangu-10 abafundise ukwakha izikebhe.
Umphathi wekomiti lokuthuthuka kwebandla, uNkk Zinhle Hlophe umemezele izinhlelo zoxhaso oluphuma kwaRenault lokusiza umphakathi okhahlanyezwe izikhukhula. Lolu hlelo lubheke nokusebenzisa abantu abasha nabesifazane ekuthungweni komfaniswano wezingane zesikole ezakhahlamezeka.