AMAPHOYISA athungatha amadoda okuthiwa avulele ngenhlamvu ebhasini ebikade ilayishe abagibeli kwafa ujuqu owesifazane ona-52 kwalimala abanye ababili.
Kubikwa ukuthi isigameko senzeke ngoLwesithathu ntambama emgwaqeni uNewlands Drive, eThekwini.
Kuvela ukuthi icala libikwe esiteshini samaphoyisa saseNewlands East kumanje ayaphenya.
Okhulumela amaphoyisa KwaZulu-Natal, uLieutenant Colonel Nqobile Gwala ulandise wathi babikelwe ukuthi kunamadoda abekade engabagibeli ebhasini, avulela ngenhlamvu ebhekise kubagibeli abathathu.
“Owesifazane oneminyaka engu-52 ushonele endaweni yesigameko, abanye abagibeli ababili, abebekade belimele, baphuthunyiswe esibhedlela,” kusho uLt Col Gwala.
Ube esenxusa noma ubani ongaba nemininingwane mayelana nalesi sigameko nolwazi ukuthi bangobani ababulali abathintekayo axhumane namaphoyisa.
ULt Col Gwala ucele abantu bathinte ocingweni uWarrant Officer Basha enombolweni ethi: 082 582 3672 noma kwaCrime Stop ethi: 08600 10111.
Bangabika nakwi-app yamaphoyisa ethi: MYSAPS futhi bangazisho ukuthi bangobani uma bethanda.