ZIBAKHALELE abasolwa ababili eWestville, eThekwini, okutholwe ukuthi banefemu ekhiqiza insangu ekhuliswa ngamakhemikhali ngokungekho emthethweni.
Abasolwa abaneminyaka engu-41 no-32 baboshwe izolo ekuseni ngesikhathi kugasela amaphoyisa kule ndlu okuthiwa ibigcwele izihlahla zensangu ezingu-50 ebezikhuliswa.
Amaphoyisa ophiko lwezobunhloli, awophiko lwamacala ezidakamizwa nawe-Inner ne-Outer West Cluster eThekwini kuthiwa ngesikhathi egasela kulo muzi athole ukuthi amakamelo amathathu abenezihlahla zensangu.
Bekungakacaci ukuthi ingabiza malini uma idayiswa.
Okhulumela amaphoyisa KwaZulu-Natal, uLt Col Thulani Zwane, uthe abasolwa bazovela maduze enkantolo ngecala lokutholakala nensangu.