BASALE ngaphandle abaholi be-ANC ezifundeni ezinkulu zaKwaZulu-Natal, iTheku neMoses Mabhida, ngesikhathi kuqokwa abazohola amathimba esikhashana azophatha i-ANC kulezi zifunda.
Obengusihlalo we-ANC eThekwini, uNkk Zandile Gumede, obengunobhala we-ANC kulesi sifunda, uMnuz Musa Nciki, obengusihlalo we-ANC esifundeni iMoses Mabhida, uMnuz Mzimkhulu Thebolla, nobengunobhala we-ANC kulesi sifunda, uMnuz Samora Ndlovu, abekho kubantu abazohola amathimba esikhashana aqokelwe ukuhola i-ANC kulezi zifunda.
I-ANC ikhethe ukuqoka izingwevu ukuba kube yizo ezihola amathimba esikhashana.
Labo abebekade bephethe izikhundla kulezi zifunda bazokuba amalungu ajwayelekile amathimba esikhashana.
UMgqugquzeli we-ANC KwaZulu-Natal, uMnuz Mike Mabuyakhulu, uthe baqoke owayeyilungu lePhalamende, uMnuz Don Gumede, ukuba kube wuye ozodidiyela i-ANC esifundeni iTheku.
Ukusho lokhu ngesikhathi ekhuluma nabezindaba eThekwini, izolo.
Owayengumphathiswa wezeziMali KwaZulu-Natal waphinde waba iphini lemeya kuMasipala waseThekwini, uNkk Belinda Scott, uqokelwe kwesikaMgcinimafa esifundeni iTheku.
Esifundeni iMoses Mabhida kuqokwe umakadebona, uMnuz Nathi Mdladla, ukuba abe ngumdidiyeli.
Oke waba yilungu lePhalamende nonobhala weCosatu KwaZulu-Natal, uMnuz Zet Luzipho, uqokelwe kwesikamgqugquzeli.
UMabuyakhulu uthe la baholi banikezwe umsebenzi wokwakha kabusha i-ANC kulezi zindawo.
"Banikezwe umsebenzi wokuvuselela ubuhlobo be-ANC nemiphakathi. Sifuna ukuthi abantu babuyelwe ukuyethemba i-ANC. Sifuna babuyise umkhuba wokusebenzela umphakathi kumalungu e-ANC, baphinde bagqugquzele ukuziphatha kahle. Sizoqhubeka nokusebenzela abantu baKwaZulu-Natal."
UMabuyakhulu uthe bazokuba nemihlangano namalungu e-ANC kuzo zonke izifunda zaKwaZulu-Natal, lapho bezothula khona ngokusemthethweni amathimba esikhasahana.
I-ANC izoholwa amathimba esikhashana kuzo zonke izifunda zaKwaZulu-Natal.
Isinqumo sokuqoka amathimba esikhashana sathathwa emva kokuba bonke ubuholi be-ANC ezifundeni zaKwaZulu-Natal buhlulekile ukuhlela ngesikhathi izingqungquthela zokukhetha ubuholi obusha.
Ubuholi be-ANC izifundeni kufanele bukhethwe kabusha njalo emva kweminyaka emithathu.
Khonamanjalo: UMabuyakhulu umemezele ukuthi sesitholakele isixazululo odabeni lwebhange Ithala, wathi ngeke lisavalwa Ithala njengoba ethe izingxoxo noNgqongqoshe wezeziMali, uMnuz Enock Godongwana, zithele izithelo ezinhle.
"Ngesikhathi kuvela izindaba zokuthi Ithala lizovalwa sanquma ukungenelela, sakhuluma noGodongwana. Engingakusho ukuthi kukhona esivumelane ngakho noGodongwana."