Namhlanje ngifisa ukukhuluma nabafowethu ngendaba yokutapuna odadewethu nezintombi zethu ezitaladini zasemadolobheni. Ngike ngizwe kuthiwe lokhu kuyenzeka nakwezinye izindawo kodwa angihlali kuzo, ngihlala eThekwni, yingakho ngifuna ukukhuluma nabaseThekwini ngqo.
Cishe wonke umuntu wesifazane engisondelene naye useke wangazisa ngokungenami kwakhe ngokugxavunwa, ukudonswa nokubizwa ngazo zonke izinhlobo zenhlamba uma bezihambela emgwaqweni uDr Pixley kaSeme (West Street), erenki yamatekisi emakethe, eBerea nakwezinye izindawo edolobheni. Abanye baze bakutshele kwezikabhoqo ukuthi khohlwa uma uhlela ukuhlangana nabo edolobheni. Abasafuni lutho okubahlanganisa nento ezobayisa edolobheni. Abanye bashintsha ngisho ebusweni uma kunento okufunele ibafake edolobheni.
Ngeke bafowethu, u-2019 manje. Ngeke kube wukuthi lo mkhuba engaqala ukuzwa ngawo ngisafunda namanje usaqhubeka. Muva nje ngisanda kukhuluma nomunye obeye edolobheni, ngithe ngimbuza ngosuku lwakhe wathi ucobekile kade etapunwa usuku lonke, abanye bekhuluma umathanda ngomzimba wakhe. Awucabange uzihambela edolobheni uyinsizwa yakwenu uhambe ugxavunwa yiwo wonke umuntu wesifazane ophambana naye ukuthi ingaba yisicefe kanjani leyo nto kuwe. Osukwini lokuqala mhlawumbe ungazizwa usezulwini elincane kodwa uma unomuntu omthandayo empilweni yakho futhi wazi ukuthi uze ngani edolobheni ingagcina isikucika nawe leyo nto yokutshelwa ukuthi ‘uyababa’, nokubanjwa kuthiwe awume kancane njalo uma ungena kuField Street.
Iqiniso ukuthi esikhathini sanamhlanje bakhona abesifazane abangabesabi abantu besilisa uma bebafuna. Sewake wafunwa umuntu wesifazane? Angisho lo osuke edlala, ngisho lo ombona kahle ukuthi uzimisele ngempela, kukhona akufisayo. Muva nje ezinkundleni zokuxhumana kunombuzo osabelele abantu besilisa bebuza ukuthi abesimame bake basibuke yini bacabange ngabafisa ukukwenza nathi uma besibona sizihambela noma sizipholele ezindaweni zobumnandi. Iningi labesifazane abaphendula lo mbuzo liveza ukuthi kunjalo impela. Umehluko nokho ukuthi abesifazane bayakwazi ukukugcina ngaphakathi lokho noma baqunga isibindi bakuqonde ngezindlela eziphansi bese kuba kuwena-ke ukuthi uyafuna ukuzibika noma owumgcwali.
Akuvamile ukuthi owesifazane ongakwazi, ongazi nanokuthi umatasa ngani ngaleso sikhathi, avele akugxumele akudonse ingalo athi ‘awenze inombolo yakho phela’. Ngeke futhi akuthuke uma ebona ukuthi awumphenduli uma ekubingelela. Ngeke akubize ngawo wonke amagama lawa ngoba nakhu unqabe ukukhuluma naye noma ukungena ebudlelwaneni naye. Thina kungani sisawuqhubeza lo mkhuba? Lokhu kukhombisa ubushimane nokungakhuli ngokomqondo. Yingakho lo mkhuba kumele siwukhuze, sifundisane izindlela zokushela ngoba kungenzeka ukuba abanye abenza lokho bazitshela ukuthi iyona ndlela yokweshela le. Lokhu kudicilelela phansi isithunzi sowesifazane. Wena owenza lokhu kothini kuwena kufika udadewenu ekhala noma indodakazi yakho ikhala ngenxa yokuthi ibitapunwa abesilisa edolobheni. Uyoshaya izandla uyithengele u-ice cream? Asibacabangele abantu besifazane.