UMBALA kapende womuzi wakho wangaphandle, owangaphakathi nefenisha ephakathi kumele kuhambisane nezidingo zakho, awumane ufake noma ikuphi.
Lokhu kushiwo uNkk Thandeka Malinga weDefyn Dezign, ongomunye wezikhulumi ezizobe zicobelela izihambeli zomcimbi wabesifazane ohlelwe Isolezwe, iNtandokazi Womens Club ozoba ngo-Okthoba. Uzocobelela ngamasu okuhlobisa umuzi wakho.
Lo mcimbi uzobe useCoastlands Hotel, eMusgrave.
UNkk Malinga ohlobisa amakhaya, ahlomise abanikazi bemizi ngolwazi lokuthi bakhe imizi ehambisana nezidingo zabo, ongumakhi wezindlu nefenisha, uthe yize kukuhle ukuthi ikhaya lomuntu libe nemibala ayithandayo kodwa imibala kumele ibe nomsebenzi odingwa ngumnikazi wekhaya njengokuthi kube imibala enikeza intokomalo, eyehlisa umoya eyenza umuntu ajabule nokunye.
" Udokotela uma esemsebenzini uhlala ebhekene neziguli ezigulayo, ikhaya lakhe kumele libe nemibala emhlophe ezokwenza ukuthi kwehle umoya. Ifenisha ephakathi nayo kumele ihambisane nokuthi indlu yakho yakheke kanjani," kusho yena.
Uthe ukuba nekhaya elingahambisani nezidingo zakho kukwenza ukuthi esikhundleni sokuthi ubuye emsebenzini uzophumula ekhaya, uhambe uye ehhotela ngoba linezinto ezenza kwehle umoya nokhwantalala lwasemsebenzini.
" Umbala kapende kumele ube yimpendulo yokudingwa umphefumulo womuntu. Kunemibala engahambisani okungamele uyihlanganise noma ngabe uyithanda kangakanani. Uma ungeke ukwazi ukungayifaki zama ukungayifaki kakhulu. Igumbi lokudlala izingane ngeke ulifake imibala engaphaphile ngoba inhloso yakho ukuthi zithi uma zingena zibe nento yokuthi kumele zihlale ngoba kuhle, kuyakhanga," kusho yena.
Uqhube wathi awukho umuzi ongeke uhlobiseke, nemizi emincane enamagumbi amane iyahlobiseka.
"Udinga ukushintsha izinto ezimbalwa kuwo uphenduke ube yinto oyithandayo," kusho uNkk Malinga.
Uthe enye into ebalulekile ukuthi amakamelo ahambisane nezidingo zomuntu uma esengaphakathi njengokuthi ungahambi ibanga elide usuka ekhishini uya e-dining room, ungahambi ibanga elide usuka ekamelweni lokuphumula eya ethoyilethi.
Amathikithi okuya kulo mcimbi angu-R500 atholakala eTicket Pro.