IBANDLA lamaNazaretha lishaya amakhala ngomdlalo weshashalazi okhuluma ngempilo yomsunguli webandla laKwaShembe, iNkosi Isaiah Shembe, uMqaliwendlela obizwa ngeRise of Shembe.
Umdlalo usungulwe yinhlalisuthi, uMphathi Shozi okhonza eBuhleni.
UMphathi uthe umdlalo uqale ukukhonjiswa eRoodepoort Theatre, eGoli ngoJuni nonyaka. Uthe ngoDisemba uzobe useJorburg Theatre kanti ngonyaka ozayo uya eNigeria, Uganda, eSwazini nasePlayhouse eThekwini.
Okhulumela abaseBuhleni, uThokozani Mncwabe uthe abahambisani nalo mdlalo futhi kuphambene nenqubo yebandla ukubakhona kwawo. “Akekho umuntu okuvumele ukuthi aziphathise okomholi waKwaShembe. Ukugqokisa okomholi kungukuphambana nenqubo yebandla. Kwayena umnikazi wawo akazange alibikele ibandla ngawo njengoba ungakaze umenyezelwe ebandleni. Noma ebengeke avunyelwe ukuthi aqhubeke nawo kodwa bekumele azise ikomiti lebandla ngawo. Kungenzeka ukuthi aveze nezinto okungamele zivezwe ngomholi webandla njengokuhlupheka kwakhe esasungula ibandla."
Okhulumela amaNazaretha aseThembezinhle, uSilindelo Bhengu, uthe abayiboni inkinga ngomdlalo kodwa abangenasiqiniseko ngakho ukuthi uveza iqiniso yini ngoMqaliwendlela. “Ngenxa yobukhulu boMqaliwendlela akuyona inkinga ukusebenzisa igama lakhe ngoba ungowomphakathi. Inkinga esinayo ukuthi asikwazi okuvezwa ngaye kulo mdlalo njengoba singakaze siwubone. Into eyinkinga ukuthi ngisho kwathina singamaNazaretha asiwazi ngendlela efanayo umlando wakhe okungaba yinto engadida abantu uma sekuvela okungaziwa. Ziningi nezinto ezike zikhulunywe ngoMqaliwendlela esizaziyo ukuthi azilona iqiniso okwenza sibe nokusaba uma kukhona umuntu othi uveza umlando wakhe."
Umfundisi Joseph Mhlongo okhulumela abaseGinyezinye naye uthe akekho umuntu okuvumeleke ukuthi alingise uShembe.
“UBabamkhulu (uMqaliwendlela) unomndeni wakhe aphinde abe nebandla. Uma kukhona okumele kwenziwe ngaye bekungaba ngcono ukuthi kuqalwe emndenini wakhe kuphinde kwaziswe nebandla. Kwawona umdlalo bekumele uqale uvezwe emndenini nasebandleni ngoba kungenzeka kuvele izinto okungamele zivele,” kusho uMhlongo.
UMphathi uthe wayicela imvume kuNyazilwezulu ngaphambi kokuba awusungule, lwamnika isibusiso ukuthi aqhubeke nawo kodwa ubengakaze awuveze ebandleni.