ZIKHALA zingashayiwe izakhamuzi zaseSoweto ngenxa yomonakalo odalwe yimvula enamandla.
NgoLwesine ebusuku kwashaya isichotho esinamandla izakhamuzi eziningi eProtea, Dlamini nase-Orlando zasala dengwane ngenxa yomonakalo odaleke emizini yazo kungena amanzi.
EProtea, omakhelwane bebesizana ukukhipha abavaleleke ezindlini ngenxa yobuningi bamanzi. Ezindaweni eziningi kuleli lokishi, kuvalwe imigwaqo egcwele amanzi.
Protea glen
— Matirhandza himself (@TlangeloTlangi) December 9, 2022
Soweto
Roodeport pic.twitter.com/Gqga5uHhnp
Akuzona zodwa izakhamuzi zaseProtea ezikhalayo njengoba kukhahlamezeke nabahlala emijondolo yase-Alexandra esonqenqemeni lomfula iJukskei, kanti naseKliptown kukhalwa esifanayo.
Lokhu kuphoqe abezimo eziphuthumayo ukuba bamise umsebenzi wokufuna ingane enezinyanga ezintathu eyaminza ngesikhathi kuminza amakholwa eyethandaza kulo mfula.
Kwesinye isigameko sokuminza kwabantu esidalwe yile mvula, abezimo eziphuthumayo basebenze kanzima ukutakula abantu abebesebhasini elicwile elokishini lase-Orlando ngesikhathi ligcwala amanzi lithwele abagibeli bebheke emsebenzini ekuseni ngoLwesihlanu.
Paramedics, police and search rescue teams are at Kliptown/Dlamini townships in Soweto where it is believed that a taxi with people and a car were swept away by floods in the early hours of the morning. #JoburgUpdates pic.twitter.com/BYAM5hyNVB
UNgqongqoshe eMnyangweni wezokuHlaliswa kwaBantu uMmamoloko Kubayi unxuse uhulumeni wesifundazwe iGauteng ukuba uhlonze lesi simo njengesiphuthumayo ukuze kudedelwe izinsiza ezifanele neziphuthumayo zokulekelela izakhamuzi.
Lo ngqongqoshe utshele abezindaba ukuthi kuhlangene zonke izigaba zikahulumeni ukuhlola umonakalo bese kuhlahlwa indlela eya phambili ukubhekana nalesi simo.
“Uhulumeni usiqaphe ngabomvu isimo njengoba sifikile lapha eSoweto sizobona umonakalo odalekile, siyazi ukuthi ne-Alexandra nezinye izindawo ezisentshonalanga yesifundazwe nazo zikhahlamezekile. Namuhla sihambele iKliptown, Nancefield neProtea Glen kodwa siyazi ukuthi ziningi ezinye izindawo ezikhahlamezekile kuleli lokishi,” kusho yena.