UNGQONGQOSHE wezokuBusa ngokuBambisana neziNdaba zoMdabu kuzwelonke, uDkt Zweli Mkhize, unxuse amabandla wathi kumele abambe iqhaza ekuhlumeleliseni izimilo zabantu ukuze kwakhiwe izwe elinozinzo.
Ethula inkulumo yakhe ngesikhathi kwethulwa ngokusemthethweni isikhwama i-Apostle KT Mkhize@zioland Foundation ebandleni iMount Zion Christian Centre eHammarsdale izolo, uMkhize uthe uma abantu bengaba nokuthula nothando ezinhliziyweni zabo singaphela isihlava sokubulalana kwehle nezinga lobugebengu.
“Uthola umuntu ehlwitha abantu izingcingo, lokho akakwenzi ngoba ethanda kodwa ukwenza ngoba akanakho ukuthula ngaphakathi kuyena. Ufike abahlwithe abantu izingcingo zabo agcine esebagwaza abanye,” kusho uMkhize.
Uthe kumele umuntu angene ebandleni enenkinga aphume eselaphekile.
Ezicukuthwaneni ebezikhona kulo mcimbi bekukhona noNimrod Nkosi wohlelo uTatakho olwalukuMzansi Magic kwiDStv 161, Mnuz Thembinkosi Ngcobo woMkhandlu weTheku noDkt May Mashengo-Mkhize unkosikazi kaMkhize.
UMphostoli Thabani Mkhize uthe umsebenzi awuqalayo wawuyiphupho likayise ongasekho uMbhishobhi Bernard Mkhize owayenesifiso sokuthi asize abantu. Ibandla liphinde lanikela ngokudla kumalungu omphakathi antulayo.