I-ANC eKZN isiqalile ukugabisa ngomcimbi okuzokhuluma kuwo uRamaphosa
UMENGAMELI we-ANC, uMnuz Cyril Ramaphosa, okuhlelwa ukuba akhulume emcimbini wale nhlangano KwaZulu-Natal
Image: Ayanda Ndamane/ Independent Newspapers
UBUHOLI be-ANC KwaZulu-Natal sebuqalile ukukhangisa umcimbi wesifundazwe wokugubha usuku lokuzalwa kwe-ANC okuzokhuluma kuwo uMengameli Cyril Ramaphosa.
Ubuholi be-ANC bufake ezinkundleni zokuxhumana imibhalo ekhombisa ukuthi umcimbi owaziwa ngeJanuwari 8, uzoba seThekwini, ngoMashi 7.
IJanuwari 8 ye-ANC kuzwelonke yayisesifundazweni iNorth West, ngenyanga eyedlule. Abantu babengagcwele enkundleni iMorulong Stadium, emumatha abantu abangu-25 000.
Ubuholi benhlangano bakhala ngelanga elalikhipha umkhovu etsheni nesiminyaminya ukuthi yikhona okwenze uRamaphosa, egcine esethula inkulumo enkundleni ebingagcwele.
Ezinye izifundazwe ziqalile ukuba neJanuwari 8 yazo ngeledlule.
IJanuwari 8 yaKwaZulu-Natal ibanjezelwe yimicimbi kahulumeni okubalwa kuyo nenkulumo uRamaphosa azoyethula ePhalamende namhlanje.
Umcimbi uzoba senkundleni yezemidlalo iTiils Crescent Sports Ground, e-Overport.
Esitatimendeni, umgqugquzeli wethimba elihola i-ANC KwaZulu-Natal, uMnuz Mike Mabuyakhulu, uthe benza umkhuba ojwayelekile kwi-ANC.
"Kuwumkhuba ojwayelekile kwi-ANC ukuthi emva kweJanuwari 8 kazwelonke, bese isifundazwe senza eyaso iJanuwari 8. Lo mcimbi ubalulekile njengoba uhlanganisa abantu nezinhlaka ezalwela inkululeko."
UMabuyakhulu uthe uRamaphosa uzokwethula inkulumo yosuku phambi kwamalungu eqembu azohambela umcimbi.
Ngosuku olwandulela umcimbi kuzoba nesidlo sakusihlwa, esizohanjelwa osomabhizinisi kanye nezinye izinhlaka zomphakathi.
Umcimbi wangenyanga ezayo uzobanjwa ngesikhathi esimatasa kwi-ANC KwaZulu-Natal.
I-ANC ihlela ukubamba izingqungquthela zokukhetha ubuholi bezifunda ezingu-11 ngaphambi kokuthi kubanjwe ingqungquthela yokukhetha ubuholi besifundazwe.
Ingqungquthela yokukhetha ubuholi besifundazwe kulindeleke ukuthi ibe ngasekupheleni kwenyanga ezayo.
Isifundazwe sesihlale isikhathi eside singenabo ubuholi obukhethwe engqungqutheleni kulandela ukuhlakazwa kobuholi maphakathi nonyaka odlule.
Ingqungquthela yokukhetha ubuholi besifundazwe kwakuhlelwe ukuthi ibe sekupheleni konyaka odlule, kodwa kwangenzeka.
Ukungabi khona kwengqungquthela kwathukuthelisa uNobhala jikelele we-ANC, uMnuz Fikile Mbalula, owaze wasabisa ngokuhlakaza ithimba elifanisa nemoto edume ngokungabi naso isivinini iTazz.
UMbalula wayekade esabise ngokuthi ithimba elihola i-ANC esifundazweni lizohlakazwa kule nyanga.
Akucaci noma i-ANC isazoqhubeka yini nokulihlakaza njengoba seliqale amalungiselelo engqungquthela yokukhetha ubuholi.