Akuhambanga ngendlela abehlele ngayo u-O'Sullivan

AKUZANGE kuhambe ngendlela abehlele ngayo umphenyi wamacala ozimele, uMnuz Paul O'Sullivan, ngesikhathi evele phambi kwekomiti lasePhalamende eliphenya izinsolo ezenziwa uKhomishana wamaPhoyisa KwaZulu-Natal, uLieutenant General Nhlanhla Mkhwanazi.

U-O'Sullivan akazange alithole ithuba lokudedela amabhomu abethembise ukuwaqhumisa ngesikhathi evele phambi kwekomiti izolo.

U-O'Sullivan ubekade ethembise ukuthi uzombula izinqe uMkhwanazi, uKhomishana wamaPhoyisa kuzwelonke, uLieutenant General Fanni Masemola, nenhloko yezinhloli, uLieutenant General Dumisani Khumalo.

Osukwini lokuqala u-O'Sullivan uphekwe ngebhodwe elincane, ebuzwa ngomlando wakhe.

Imibuzo eminingi ibigxile ekutheni u-O'Sullivan wafika kanjani kuleli, nokuthi yini ayeyenza kuleli ngesikhathi sobandlululo.

U-O'Sullivan uzamile ukuyivimba imibuzo ethinta ayekwenza ngesikhathi sobandlululo, ethi akafuni ukuyiphendula ngenxa yezokuphepha.

Kepha lokhu akuzange kumsebenzele njengoba amalungu ekomiti eqhubekile ngokumbuza ngokufika kwakhe kuleli.

U-O'Sullivan, ongowokuzalwa e-Ireland, waqala ukufika kuleli evakasha ngeminyaka yo-1980 ngesikhathi sobandlululo. Uthe wafike walithanda elakuleli, wabe esecela ukunikezwa ubuzwe.

Amalungu ekomiti abuze u-O'Sullivan ngencwadi emcelela ubuzwe kuleli.

Incwadi yabhalwa owayengungqongqoshe wezokuthutha eNatal, uMnuz Watterson.

Kule ncwadi uWatterson wathi u-O'Sullivan uzokuba wusizo ebelungwini.

Ohola ubufakazi, u-Advocate Norman Arendse, uthe u-O'Sullivan wayencengelwa ngisho nangabantu ababengamaphoyisa ngaphansi kukahulumeni wobandlululo ukuba anikezwe ubuzwe bakuleli.

U-Arendse ufune ukwazi ukuthi ngabe u-O'Sullivan wayehambisana yini nokwakwenziwa wuhulumeni wobandlululo.

USotswebhu omkhulu ePhalamende, uMnuz Mdumiseni Ntuli, uthe ayigculisi impendulo ka-O'Sullivan yokuthi wayengazi ngezinye izinto ezazenzeka kuleli.

"Wawuneminyaka engaphezu kuka-20 ngesikhathi uvakasha kuleli. Umuntu oneminyaka engaphezu kuka-20 usuke esazi ukuthi kwenzekani emhlabeni."

Umholi we-EFF, uMnuz Julius Malema, uthe umhlaba wonke wawazi ngokwakwenzeka eNingizimu Afrika.

"Kwakunomkhankaso omkhulu wokuba kukhululwe uMandela. Wena ufuna ukungitshela ukuthi wawungazi ngalowo mkhankaso?"

U-O'Sullivan uveze ukuthi uke wasebenzela amaphoyisa akuleli, eyi-reservist.

Uthe uke futhi waqeqesha amaphoyisa angama-reservist, wathi waqeqesha ngisho noMengameli Cyril Ramaphosa.

"Ngangimkhonzile uRamaphosa ngoba wayengumfundi owayelalela."