Kubhuntshe umhlangano weNFP neMKP

UHLEHLISELWE usuku olungaziwa umhlangano weNFP neMKP, obubizelwe ukuzobhunga ngekusasa likahulumeni waKwaZulu-Natal.

Umhlangano obekufanele ube ngoMgqibelo, eThekwini, uhlehliswe ngemizuzu yokugcina.

Kulo mhlangano bekulindeleke ukuthi kubhungwe eyokufaka kabusha isiphakamiso sokungabethembi ubuholi bukaNdunankulu waKwaZulu-Natal, uMnuz Thami Ntuli.

UNobhala Jikelele weNFP obambile, uMnuz Sunset Xaba, akazange afune ukuchaza isizathu sokuhlehla komhlangano.

"Asikanqumi ukuthi sizophinde sihlangane nini."

I-NFP ingababeki benkosi kuhulumeni waKwaZulu-Natal kanti iMKP yona igaqele ukuphatha isifundazwe.

Isiphakamiso sokungabethembi ubuholi bukaNtuli esasifakwe yiMKP, sabhuntsha ngonyaka odlule.

Amalungu eMKP nawe-EFF, avele aphazamisa umhlangano ngesikhathi sekucacile ukuthi iNFP ngeke iseseke isiphakamiso sokungabethembi ubuholi bukaNtuli.

Incwadi yeMKP ebimemela iNFP emhlanganweni wangoMgqibelo, ibiveza ukuthi kuzokhulunywa eyokufaka kabusha isiphakamiso sokungabethembi ubuholi bukaNtuli.

Incwadi ebhalwe yiPhini likaMengameli lesibili leMKP, uMnuz Tony Yengeni, iveze ukuthi emhlanganweni bekuzobhungwa ngamaqhinga okunxenxa amanye amaqembu anemigomo efanayo ukuba ahlangane, akhe uhulumeni wesifundazwe.

I-MKP inezihlalo ezingu-37 kwezingu-80 esiShayamthetho, yesekwa yi-EFF enezihlalo ezimbili esiShayamthetho. Lokhu kwenza ukuthi isihlalo seNFP esisodwa sibaluleke.

Isihlalo seNFP sibanjwe uMphathiswa wezokuThuthukiswa koMphakathi, uNksz Mbali Shinga, obhekene nekomiti lokuqondiswa ubugwegwe ngenxa yokuthi usolwa ngokushaya indiva umyalelo wokuba aseke isiphakamiso sokungabethembi ubuholi bukaNtuli.

UNksz Shinga wawushaya indiva umyalelo wobuholi beNFP wokuba asule esikhundleni.

Khonamanjalo: I-NFP iyaqhubeka nokubamba imihlangano namaqembu ameleleke esiShayamthetho saKwaZulu-Natal.

UXaba uqinisekise ukuthi bazohlangana neqembu elihola uhulumeni wesifundazwe, i-IFP ngeSonto.

"Uma uzokhumbula, abaholi be-IFP babekade becele ukuthi sihlangane ngoMsombuluko wanamhlanje noma lona ozayo. Ngenxa yezinhlelo zeNFP, sicele ukuthi umhlangano ube ngeSonto."

Ubuholi beNFP busanda kunqaba isimemo somhlangano wamaqembu abusa ngokubambisana, bukhala ngokuthi bufuna ukuqale buhlangane nobuholi be-IFP eceleni ngaphambi kokuthi kube nomhlangano ozohanjelwa abaholi bawo wonke amaqembu abusa ngokubambisana.

Ubuholi beNFP buvele sebuke babamba imihlangano namanye amaqembu abusa ngokubambisana KwaZulu-Natal, i-ANC neDA.

Kwenzeka sonke lesi siphithiphithi nje, uNtuli kulindeleke ukuthi ethule inkulumo ngesimo sesifundazwe ngasekupheleni kwenyanga.