Kulindeleleke kuqothuke utshani kwiMatshwelele Festival

IUMGQUGQUZELI obuye abe yinxusa leMatshwelele Festival, uZamambo Mkhize, kulo nyaka uthi kulindeleke ukuthi kutheleke amatshitshi angaphezu kuka-10 000 eCurries Fountain Stadium, eThekwini ngoMashi 7.

Kulo mcimbi waminyaka yonke kuzobe kusina kudedelana uMthandeni SK, Babes Wodumo, Khuzani, Big NUZ, Dankie Boi, Gatsheni, Natasha K, Ntencane, Saliwa, Jaiva Zimnike, Ali Mgube, Omathwala, Qwabe Twins, Skweletu, Lungelo Hlongwane, DJ Kotini, Shenge WaseHlalankosi, Thandeka Hadebe, Mjabulisi, AmaYellowBone, Zamambo, Navigator, Thokozani Langa, Maganga Thishela, Limit, Gandaganda, DJ Mngadi, DJ Boonu, Sminofu, Feza, Mayoghurt, Sizwe Mdlalose, Shuni Wasemzini, Mjolisi nabanye.

Lokhu kuvele esithangamini nabezindaba ebesiku-27 Meridian Drive eMhlanga Ridge, eThekwini ngoLwesine. Umsakazi woKhozi FM, obephethe uhlelo, uKhathide "Tshatha" Ngobe, uthe lo mcimbi uzobe sewenziwa okwesibili. Uthe owokuqala wahamba kahle kakhulu kugcwele izintokazi ezaziliqhamukisa kuzozonke izinkalo.

Unxuse wonke amatshitshi ukuba aphume ngobuningi bawo, noma ngabe itshitshi liwuluphi uhlanga. UZamambo uthe inhlosongqangi ngalo mcimbi wukuvumbulula nokuthuthukisa amakhono amatshitshi. Uthe amatshitshi azobe eqhakambisa amakhono ahlukahlukene njengokucula nokunye.

Umsunguli nomqondisi waMatshwelele Festival, uLindani "Papa G" Gumede, uthe lona akusiwo umcimbi kodwa wumgubho wesiko lakwaZulu. Ubonge kakhulu izintombi nonomehlo ngokuba yingxenye yomcimbi.

Uthe okwenze lo mcimbi wakhuza ibuya yingcindezi yabantu ebebewufuna. Amathikithi aseyatholakala eTicketPro ngemali esukela kukaR150 kuya kuR1000.