USenona ohlwini lwamaphoyisa uRamaphosa afuna ukuba aphenywe

INHLOKO yoKlebe KwaZulu-Natal, uMajor General Lesetja Senona, iyingxenye yamaphoyisa amahlanu uMengameli Cyril Ramaphosa, afuna ukuthi aphenywe.

Igama likaSenona livela ohlwini lwamaphoyisa uRamaphosa aphakamise ukuthi aphenyelwe izinsolo zokusebenzisana nemigulukudu.

USenona usolwa ngokusondelana nosomabhizinisi obhekene noxhaxha lwamacala, uMnuz Vusimuzi "Cat" Matlala.

URamaphosa uphakamise ukuthi amaphoyisa amahlanu aphenywe emva kokucubungula umbiko awunikwa ikhomishini ephenya izinsolo ezenziwa uKhomishana wamaPhoyisa KwaZulu-Natal, uLieutenant General Nhlanhla Mkhwanazi.

Amanye amaphoyisa uRamaphosa afuna aphenywe uMajor General Richard Shibiri, Brigadier Mbangwa Nkhwashu, Brigadier Rachel Matjeng noSergeant Fannie Nkosi.

Onke la maphoyisa asolwa ngokusebenzisana nemigulukudu.

URamaphosa uyalele uNgqongqoshe wamaPhoyisa obambile, uSolwazi Firoz Cachalia, ukuba asungule ithimba elizophenya izinto ezivela kwikhomishini.

URamaphosa uphinde wayalela ukuba kuthathelwe izinyathelo amaphoyisa kuMasipala wase-Ekurhuleni, okukhona kuwo nesikhulu samaphoyisa kamasipala esimisiwe, uBrigadier Julius Mkhwanazi.

Kube nemibuzo igama likaNgqongqoshe wamaPhoyisa omisiwe, uMnuz Senzo Mchunu, lingaveli ohlwini lwabantu okufanele baphenywe.

Okhulumela uRamaphosa, uMnuz Vincent Magwenya, uthe uRamaphosa ufuna ukunika uMchunu ithuba lokuba ayoziphendulela phambi kwekhomishini ngaphambi kokuthi amthathele izinyathelo.

Khonamanjalo, ikhomishini eholwa iJaji Mbuyiseli Madlanga iqhubekile izolo nokupheka ngebhodwe elincane uSenona.

Ikhomishini ifune ukwazi ukuthi kungani uSenona engazange ayohlolwa emshinini okwazi ukubona umuntu oqamba emva kokulahleka kwezidakamizwa zezigidi zamarandi ezazigcinwe oKlebe.

USenona utshele ikhomishini ukuthi onke amaphoyisa ayesebenza ngesikhathi oKlebe beshaqa izidakamizwa zika-R200 million, aya kohlolwa umshini. Lezi zidakamizwa zantshontshwa zigcinwe oKlebe ePort Shepstone.

USenona uthe onke amaphoyisa ahlolwa kwatholakala ukuthi awazi lutho ngokulahleka kwezidakamizwa. Ubuzwe ukuthi kungani yena engahlolwanga, wathi umphathi wakhe akashongo ukuthi kufanele naye ahlolwe.

"Angicabanganga ngaleso sikhathi ukuthi nami ngicele ukuba nami ngihlolwe. Umuntu ongiphethe uyena okwakufanele asho ukuthi angiye kohlolwa nami. Mhlawumbe kufanele engabe ngacela nami ukuthi ngihlolwe. Emhlabeni siyafunda zonke izinsuku. Kukhona isifundo engisitholile nami. Isifundo engisitholile sizongisiza kakhulu ngomuso."

USenona ubuzwe ukuthi engavuma yini uma kungase kushiwo manje ukuthi akayohlolwa, wathi akasiboni isidingo sokuthi ahlolwe manje.

"Ngabe uzama ukusho ukuthi kufanele nami ngiyohlolwa? Sesidlulile isikhathi salokho."